Jacob is hardly persuaded to send Benjamin.
Genesis 43:1 In the meene tyme hungur oppresside greetli al the lond; Genesis 43:2 and whanne the meetis weren wastid, whiche thei brouyten fro Egipt, Jacob seide to hise sones, Turne ye ayen, and bie ye a litil of meetis to vs. Genesis 43:3 Judas answeride, The ilke man denounside to vs vndir witnessyng of an ooth, and seide, Ye schulen not se my face, if ye schulen not brynge with you youre leeste brother; Genesis 43:4 therfor if thou wolt sende hym with vs, we schulen go to gidere, and we schulen bie necessaries to thee; Genesis 43:5 ellis if thou wolt not, we schulen not go; for as we seiden ofte, the man denounside to vs, and seide, Ye schulen not se my face with out youre leeste brother. Genesis 43:6 Forsothe Israel seide to hem, Ye diden this in to my wretchidnesse, that ye schewiden to hym, that ye hadden also another brother. Genesis 43:7 And thei answeriden, The man axide vs bi ordre oure generacioun, if the fadir lyuede, if we hadden a brother; and we answeriden suyngli to hym, bi that that he axide; whether we myyten wite that he wolde seie, Brynge ye youre brothir with you? Genesis 43:8 And Judas seide to his fadir, Sende the child with me, that we go, and moun lyue, lest we dien, and oure litle children; Genesis 43:9 Y take the child, require thou hym of myn hoond; if Y schal not brynge ayen, and bitake hym to thee, Y schal be gilti of synne ayens thee in al tyme; Genesis 43:10 if delai hadde not be, we hadden come now anothir tyme. Genesis 43:11 Therfor Israel, the fadir of hem, seide to hem, If it is nede so, do ye that that ye wolen; take ye of the beste fruytis of the lond in youre vesselis, and bere ye yiftis to the man, a litil of gumme, and of hony, and of storax, and of mirre, and of therebynte, and of alemaundis; Genesis 43:12 and bere ye with you double money, and bere ye ayen that money which ye founden in baggis, lest perauenture it be doon bi errour; Genesis 43:13 but also take ye youre brother, and go ye to the man; Genesis 43:14 forsothe my God Almyyti mak him pesible to you, and sende he ayen youre brother, whom he holdith in boondis, and this Beniamyn; forsothe Y schal be as maad bare without sones.
Joseph entertaineth his brethren.
Genesis 43:15 Therfor the men token yiftis, and double monei, and Beniamyn; and thei yeden doun in to Egipt, and stoden bifore Joseph. Genesis 43:16 And whanne he hadde seyn hem and Beniamyn togidere, he comaundide the dispendere of his hows, and seide, Lede these men in to the hous, and sle beestis, and make a feeste; for thei schulen ete with me to dai. Genesis 43:17 He dide as it was comaundid, and ledde the men in to the hows; Genesis 43:18 and there thei weren aferd, and seiden to gidere, We ben brouyt in for the monei which we baren ayen bifore in oure sackis, that he putte chalenge in to vs, and make suget bi violence to seruage bothe vs and oure assis. Genesis 43:19 Wherfor thei neiyeden in the yatis, and spaken to the dispendere, Genesis 43:20 Lord, we preien that thou here vs; we camen doun now bifore that we schulden bie metis; Genesis 43:21 whanne tho weren bouyt, whanne we camen to the ynne, we openeden oure baggis, and we founden money in the mouth of sackis, which money we han brouyt ayen now in the same weiyte; Genesis 43:22 but also we han brouyt other siluer, that we bie tho thingis that ben nedeful to vs; it is not in oure conscience, who puttide the money in oure pursis. Genesis 43:23 And he answerde, Pees be to you, nyle ye drede; youre God and God of youre fadir yaf to you tresouris in youre baggis; for I haue the monei preued, which ye yauen to me. And he ledde out Symeon to hem; Genesis 43:24 and whanne thei weren brouyt in to the hows, he brouyte watir, and thei waischiden her feet, and he yaf meetis to her assis. Genesis 43:25 Sotheli thei maden redi yiftis til Joseph entride at myd day, for thei hadden herd that thei schulden ete breed there.
Genesis 43:26 Therfor Joseph entride in to his hows, and thei offriden yiftis to hym, and helden in the hondis, and worschipiden lowe to erthe. Genesis 43:27 And he grette hem ayen mekeli; and he axide hem, and seide, Whether youre fadir, the elde man, is saaf, of whom ye seiden to me? lyueth he yit? Genesis 43:28 Whiche answeriden, He is hool, thi seruaunt oure fadir lyueth yit; and thei weren bowid, and worschipiden hym. Genesis 43:29 Forsothe Joseph reyside hise iyen, and siy Beniamyn his brother of the same wombe, and seide, Is this youre litil brother, of whom ye seiden to me? And eft Joseph seide, My sone, God haue merci of thee. Genesis 43:30 And Joseph hastide in to the hous, for his entrailis weren moued on his brother, and teeris brasten out, and he entride into a closet, and wepte.
He maketh them a feast.
Genesis 43:31 And eft whanne the face was waischun, he yede out, and refreynede hym silf, and seide, Sette ye looues. Genesis 43:32 And whanne tho weren set to Joseph by hym silf, and to the britheren bi hem silf, and to Egipcyans that eeten to gidre by hem silf; for it is vnleueful to Egipcians to ete with Ebrewis, and thei gessen sich a feeste vnhooli. Genesis 43:33 Therfor thei saten bifore hym, the firste gendrid bi the rite of his firste gendryng, and the leeste bi his age; and thei wondriden greetli, Genesis 43:34 whanne the partis weren takun whiche thei hadden resseyued of him, and the more part cam to Beniamyn, so that it passide in fyue partis; and thei drunken, and weren fillid with him.