The sons of Abraham by Keturah.
Genesis 25:1 Forsothe Abraham weddide another wijf, Ceture bi name, Genesis 25:2 which childide to him Samram, and Jexan, and Madan, and Madian, and Jesboth, and Sue. Genesis 25:3 Also Jexan gendride Saba and Dadan. Forsothe the sones of Dadan weren Asurym, and Lathusym, and Laomym. Genesis 25:4 And sotheli of Madian was borun Efa, and Ofer, and Enoth, and Abida, and Heldaa; alle these weren the sones of Cethure.
The division of his goods.
Genesis 25:5 And Abraham yaf alle thingis whiche he hadde in possessioun to Isaac; Genesis 25:6 sotheli he yaf yiftis to the sones of concubyns; and Abraham, while he lyuede yit, departide hem fro Ysaac, his sone, to the eest coost.
His age, and death.
Genesis 25:7 Forsothe the daies of lijf of Abraham weren an hundrid and fyue and seuenti yeer; Genesis 25:8 and he failide, and diede in good eelde, and of greet age, and ful of daies, and he was gaderid to his puple.
Genesis 25:9 And Ysaac and Ismael, his sones, birieden him in the double denne, which is set in the feeld of Efron, sone of Seor Ethei, Genesis 25:10 euene ayens Mambre, which denne he bouyte of the sones of Heth; and he was biried there, and Sare his wijf.
Genesis 25:11 And aftir the deeth of Abraham God blesside Isaac his sone, which dwellide bisidis the pit bi name of hym that lyueth and seeth.
The generations of Ishmael.
Genesis 25:12 These ben the generaciouns of Ismael, sone of Abraham, whom Agar Egipcian, seruauntesse of Sare, childide to Abraham; Genesis 25:13 and these ben the names of the sones of Ismael, in her names and generaciouns. The firste gendride of Ismael was Nabaioth, aftirward Cedar, and Abdeel, and Mabsan, Genesis 25:14 and Masma, and Duma, and Massa, Genesis 25:15 and Adad, and Thema, and Ithur, and Nafir, and Cedma. Genesis 25:16 These weren the sones of Ismael, and these weren names by castels and townes of hem, twelue princes of her lynagis.
His age, and death.
Genesis 25:17 And the yeeris of lijf of Ismael weren maad an hundrid and seuene and thretti, and he failide, and diede, and was put to his puple. Genesis 25:18 Forsothe he enhabitide fro Euila til to Sur, that biholdith Egipt, as me entrith in to Assiriens; he diede bifore alle his britheren.
Genesis 25:19 Also these ben the generaciouns of Ysaac sone of Abraham. Abraham gendride Isaac, Genesis 25:20 and whanne Isaac was of fourti yeer, he weddide a wijf, Rebecca, douyter of Batuel, of Sirie of Mesopotanye, the sistir of Laban.
Isaac prayeth for Rebekah, being barren.
Genesis 25:21 And Isaac bisouyte the Lord for his wijf, for sche was bareyn; and the Lord herde him, and yaf conseiuyng to Rebecca.
The children strive within her womb.
Genesis 25:22 But the litle children weren hurtlid togidre in hir wombe; and sche seide, If it was so to comynge to me, what nede was it to conseyue? And sche yede and axide counsel of the Lord, Genesis 25:23 which answerde, and seide, Twei folkis ben in thi wombe, and twei puplis schulen be departid fro thi wombe, and a puple schal ouercome a puple, and the more schal serue the lesse.
The birth of Esau and Jacob.
Genesis 25:24 Thanne the tyme of childberyng cam, and lo! twei children weren foundun in hir wombe. Genesis 25:25 He that yede out first was reed, and al rouy in the manere of a skyn; and his name was clepid Esau. Genesis 25:26 Anoon the tothir yede out, and helde with the hond the heele of the brother; and therfore he clepide him Jacob. Isaac was sixti yeer eeld, whanne the litle children weren borun.
Genesis 25:27 And whanne thei weren woxun, Esau was maad a man kunnynge of huntyng, and a man erthe tilier; forsothe Jacob was a symple man, and dwellide in tabernaclis. Genesis 25:28 Isaac louyde Esau, for he eet of the huntyng of Esau; and Rebecca louyde Jacob.
Esau selleth his birthright.
Genesis 25:29 Sotheli Jacob sethide potage; and whanne Esau cam weri fro the feld, Genesis 25:30 he seide to Jacob, Yyue thou to me of this reed sething, for Y am ful weri; for which cause his name was clepid Edom. Genesis 25:31 And Jacob seide to him, Sille to me the riyt of the first gendrid childe. Genesis 25:32 He answerde, Lo! Y die, what schulen the firste gendrid thingis profite to me? Genesis 25:33 Jacob seide, therfor swere thou to me. Therfor Esau swoor, and selde the firste gendrid thingis. Genesis 25:34 And so whanne he hadde take breed and potage, Esau eet and drank, and yede forth, and chargide litil that he hadde seld the riyt of the firste gendrid child.