Genesis 21
Isaac is born.
Genesis 21:1 Forsothe God visitide Sare, as he bihiyte, and fillide tho thingis, that he spak. Genesis 21:2 And sche conseyuede, and childide a sone in hir eeld, in the tyme wherynne God biforseide to hir. Genesis 21:3 And Abraham clepide the name of his sone, whom Sare childide to him, Ysaac.
He is circumcised.
Genesis 21:4 And Abraham circumcidide hym in the eiyte dai, as God comaundide to him, Genesis 21:5 whanne he was of an hundrid yeer; for Ysaac was borun in this age of the fadir.
Sarah's joy.
Genesis 21:6 And Sare seide, The Lord made leiyynge to me, and who euer schal here schal leiye with me. Genesis 21:7 And eft sche seide, Who schulde here, and bileue to Abraham, that Sare schulde yyue soukyng to a sone, whom sche childide to him now an eld man? Genesis 21:8 Therfor the child encreesside, and was wenyd; and Abraham made a greet feeste in the dai of his wenyng.
Hagar and Ishmael are cast forth.
Genesis 21:9 And whanne Sare seiy the sone of Agar Egipcian pleiynge with Ysaac hir sone, sche seide to Abraham, Genesis 21:10 Cast thou out the handmayde and hir sone; for the sone of the handmayde schal not be eir with my sone Ysaac. Genesis 21:11 Abraham took this heuyli for his sone;
Genesis 21:12 and God seide to hym, Be it not seyn scharp to thee on the child, and on thin handmayde; alle thingis whiche Sare seith to thee, here thou hir vois, for in Isaac seed schal be clepid to thee; Genesis 21:13 but also I schal make the sone of the handmaid in to a greet folk, for he is thi seed. Genesis 21:14 And so Abraham roos eerli, and took breed, and a botel of watir, and puttide on hir schuldre, and bitook the child, and lefte hir; and whanne sche hadde go, sche yede out of the weie in the wildirnesse of Bersabee.
Hagar in distress.
Genesis 21:15 And whanne the watir in the botel was endid, sche castide awei the child vndur a tre that was there; Genesis 21:16 and sche yede awei, and sche sat euene ayens as fer as a bowe may caste; for sche seide, Y schal not se the child diynge; and sche sat ayens, and reiside hir vois, and wepte.
The angel comforteth her.
Genesis 21:17 Forsothe the Lord herde the vois of the child, and the aungel of the Lord clepide Agar fro heuene, and seide, What doist thou, Agar? nyle thou drede, for God hath herd the vois of the child fro the place where ynne he is. Genesis 21:18 Rise thou, and take the child, and holde his hoond; for Y schal make hym in to a greet folc. Genesis 21:19 And God openyde hir iyen, and sche seiy a pit of watir, and sche yede, and fillide the botel, and sche yaf drynk to the child; Genesis 21:20 and was with him, and he encresside, and dwellide in wildernesse, and he was maad a yong man an archer, Genesis 21:21 and dwellide in the deseert of Faran; and his modir took to him a wijf of the lond of Egipt.
Abimelech's covenant with Abraham at Beer-sheba.
Genesis 21:22 In the same tyme Abymelech, and Ficol, prince of his oost, seide to Abraham, God is with thee in alle thingis whiche thou doist; Genesis 21:23 therfore swere thou bi God that thou noye not me, and myn eiris, and my kynrede; but bi the mersi whych Y dide to thee, do thou to me, and to the lond in which thou lyuedist a comelyng. Genesis 21:24 And Abraham seide, Y schal swere. Genesis 21:25 And he blamyde Abymelech for the pit of watir, which hise seruauntis token awey bi violence. Genesis 21:26 And Abymelech answerde, I wiste not who dide this thing, but also thou schewidist not to me, and Y herde not outakun to dai. Genesis 21:27 And so Abraham took scheep and oxun, and yaf to Abymalech, and bothe smyten a boond of pees. Genesis 21:28 And Abraham settide seuene ewe lambren of the flok asidis half. Genesis 21:29 And Abymelech seide to hym, What wolen these seuene ewe lambren to hem silf, whiche thou madist stonde asidis half? Genesis 21:30 And he seide, Thou schalt take of myn hond seuene ewe lambren, that tho be in to witnessyng to me, for Y diggide this pit. Genesis 21:31 Therfor thilke place was clepid Bersabee, for euere eithir swore there; Genesis 21:32 and thei maden boond of pees for the pit of an ooth. Forsothe Abymelech roos, and Ficol, prince of his chyualrie, and thei turneden ayen in to the lond of Palestyns.
Genesis 21:33 Sotheli Abraham plauntide a wode in Bersabee, and inwardli clepide there the name of euerlastinge God; Genesis 21:34 and he was an erthetiliere ether a comelynge of the lond of Palestynes in many dayes.
|
