Genesis 17
God reneweth the Covenant.
Genesis 17:1 Forsothe aftir that Abram bigan to be of nynti yeer and nyne, the Lord apperide to hym, and seide to him, Y am Almyyti God; go thou bifore me, and be thou perfit; Genesis 17:2 and Y schal sette my couenaunt of pees bitwixe me and thee; and Y schal multiplie thee ful greetli. Genesis 17:3 And Abram felde doun lowe on his face. And God seide to hym, Genesis 17:4 Y am, and my couenaunt of pees is with thee, and thou schalt be the fadir of many folkis;
Abram his name is changed in a token of a greater blessing.
Genesis 17:5 and thi name schal no more be clepid Abram, but thou schalt be clepid Abraham, for Y haue maad thee fadir of many folkis; Genesis 17:6 and Y schal make thee to wexe ful greetli, and Y schal sette thee in folkis, and kyngis schulen go out of thee; Genesis 17:7 and Y schal make my couenaunt bitwixe me and thee, and bitwixe thi seed after thee, in her generaciouns, bi euerlastynge bond of pees, that Y be thi God, and of thi seed after thee; Genesis 17:8 and Y schal yyue to thee and to thi seed after thee the lond of thi pilgrymage, al the lond of Chanaan, in to euerlastynge possessioun, and Y schal be the God of hem.
Genesis 17:9 God seide eft to Abraham, And therfor thou schalt kepe my couenaunt, and thi seed after thee, in her generaciouns.
Circumcision is instituted.
Genesis 17:10 This is my couenaunt, which ye schulen kepe bitwixe me and you, and thi seed after thee; ech male kynde of you schal be circumcidid, Genesis 17:11 and ye schulen circumside the fleisch of youre mannes yeerd, that it be in to a signe of boond of pees bytwixe me and you. Genesis 17:12 A yong child of eiyte daies schal be circumsidid in you, al male kynde in youre generaciouns, as wel a borun seruaunt as a seruaunt bouyt schal be circumsidid, and who euere is of youre kynrede he schal be circumsidid; Genesis 17:13 and my couenaunt schal be in youre fleisch in to euerlastynge boond of pees. Genesis 17:14 A man whos fleisch of his yerde schal not be circumsidid, thilke man schal be doon a wei fro his puple; for he made voide my couenaunt.
Sarai her name is changed, and she is blessed.
Genesis 17:15 Also God seide to Abraham, Thou schalt not clepe Saray, thi wijf, Sarai, but Sara;
Isaac is promised.
Genesis 17:16 and Y schal blesse hir, and of hir I schal yyue to thee a sone, whom I schal blesse, and he schal be in to naciouns, and kyngis of puplis schulen be borun of hym. Genesis 17:17 Abraham felde doun on his face, and leiyede in his hert, and seide, Gessist thou, whethir a sone schal be borun to a man of an hundrid yeer, and Sara of nynti yeer schal bere child? Genesis 17:18 And he seide to the Lord, Y wolde that Ismael lyue bifore thee. Genesis 17:19 And the Lord seide to Abraham, Sara, thi wijf, schal bere a sone to thee, and thou schalt clepe his name Ysaac, and Y schal make my couenaunt to hym in to euerlastynge boond of pees, and to his seed aftir hym; Genesis 17:20 also on Ysmael Y haue herd thee, lo! Y schal blesse him, and Y schal encreesse, and Y schal multiplie him greetli; he schal gendre twelue dukis, and Y schal make hym in to a greet folk. Genesis 17:21 Forsothe Y schal make my couenaunt to Ysaac, whom Sare schal childe to thee in this tyme in the tother yeer. Genesis 17:22 And whanne the word of the spekere with hym was endid, God stiede fro Abraham.
Abraham and Ishmael are circumcised.
Genesis 17:23 Forsothe Abraham took Ismael, his sone, and alle the borun seruauntis of his hous, and alle which he hadde bouyte, alle the malis of alle men of his hous, and circumsidide the fleisch of her yerde, anoon in that dai, as the Lord comaundide him. Genesis 17:24 Abraham was of nynti yeer and nyne whanne he circumsidide the fleisch of his yeerd, Genesis 17:25 and Ismael, his sone, hadde fillid threttene yeer in the tyme of his circumsicioun. Genesis 17:26 Abraham was circumsidid in the same day, and Ismael his sone, Genesis 17:27 and alle men of his hows, as wel borun seruauntis as bouyt and aliens, weren circumcidid togidre.
|
