Genesis 16
Sarai, being barren, giveth Hagar to Abram.
Genesis 16:1 Therfor Sarai, wijf of Abram, hadde not gendrid fre children; but sche hadde a seruauntesse of Egipt, Agar bi name, and seide to hir hosebonde, Lo! Genesis 16:2 the Lord hath closid me, that Y schulde not bere child; entre thou to my seruauntesse, if in hap Y schal take children, nameli of hir. And whanne he assentide to hir preiynge, sche took Agar Egipcian, Genesis 16:3 hir seruauntesse, after ten yeer aftir that thei begunne to enhabite in the lond of Chanaan, and sche yaf Agar wiif to hir hosebonde.
Genesis 16:4 And Abram entride to Agar; and Agar seiy that sche hadde conseyued, and sche dispiside hir ladi. Genesis 16:5 And Saray seide to Abram, Thou doist wickidli ayens me; I yaf my seruauntesse in to thi bosum, which seeth, that sche conseyuede, and dispisith me; the Lord deme betwixe me and thee.
Hagar, being afflicted for despising her mistress, runneth away.
Genesis 16:6 And Abram answerde and seide to hir, Lo! thi seruauntesse is in thin hond; vse thou hir as it likith. Therfor for Sarai turmentide hir, sche fledde awei.
An angel sendeth her back to submit herself,
Genesis 16:7 And whanne the aungel of the Lord hadde founde hir bisidis a welle of watir in wildernesse, which welle is in the weie of Sur in deseert, Genesis 16:8 he seide to hir, Fro whennus comest thou Agar, the seruauntesse of Sarai, and whidur goist thou? Which answerde, Y fle fro the face of Sarai my ladi. Genesis 16:9 And the aungel of the Lord seide to hir, Turne thou ayen to thi ladi, and be thou mekid vndur hir hondis. Genesis 16:10 And eft he seide, Y multipliynge schal multiplie thi seed, and it schal not be noumbrid for multitude.
and telleth her of her child.
Genesis 16:11 And aftirward he seide, Lo! thou hast conseyued, and thou schalt bere a sone, and thou schalt clepe his name Ismael, for the Lord hath herd thi turment; Genesis 16:12 this schal be a wielde man; his hond schal be ayens alle men, and the hondis of alle men schulen be ayens him; and he schal sette tabernaclis euene ayens alle his britheren. Genesis 16:13 Forsothe Agar clepide the name of the Lord that spak to hir, Thou God that seiyest me; for sche seide, Forsothe here Y seiy the hynderere thingis of him that siy me. Genesis 16:14 Therfor sche clepide thilke pit, the pit of hym that lyueth and seeth me; thilk pit is bitwixe Cades and Barad.
Ishmael is born.
Genesis 16:15 And Agar childide a sone to Abram, which clepide his name Ismael. Genesis 16:16 Abram was of eiyti yeere and sixe, whanne Agar childide Ysmael to hym.
|
