Genesis 14
The battle of four kings against five.
Genesis 14:1 Forsothe it was don in that tyme, that Amrafel, kyng of Sennaar, and Ariok, kyng of Ponte, and Chodorlaomor, kyng of Elemytis, Genesis 14:2 and Tadal, kyng of folkis, bigunnen batel ayens Bara, kyng of Sodom, and ayens Bersa, kyng of Gomorre, and ayens Sennaar, kyng of Adama, and ayens Semeber, kyng of Seboym, and ayens the kyng of Bale; thilke Bale is Segor. Genesis 14:3 Alle these camen togidre in to the valey of wode, which is now the see of salt. Genesis 14:4 For in twelue yeer thei seruyden Chodorlaomor, and in the threttenthe yeer thei departiden fro hym. Genesis 14:5 Therfor Chodorlaomor cam in the fourtenthe yeer, and kyngis that weren with him, and thei han smyte Rafaym in Astaroth Carnaym, and Susym with hem, and Emym in Sabe Cariathaym, Genesis 14:6 and Choreis in the hillis of Seir, til to the feldi placis of Faran, which is in wildirnesse. Genesis 14:7 And thei turneden ayen, and camen til to the welle Mesphath; thilke is Cades. And thei han smyte al the cuntre of men of Amalec, and Amorrei, that dwellide in Asason Thamar. Genesis 14:8 And the kyng of Sodom, and the king of Gomorre, and the kyng of Adama, and the kyng of Seboym, also and the kyng of Bale, which is Segor, yeden out, and dressiden scheltrun ayens hem in the valei of wode, Genesis 14:9 that is, ayens Chodorlaomor, kyng of Elamytis, and Thadal, kyng of folkis, and Amrafel, kyng of Sennaar, and Ariok, kyng of Ponte; foure kyngis ayens fyue. Genesis 14:10 Forsothe the valey of the wode hadde many pittis of pitche; and so the kyng of Sodom and the kyng of Gomorre turneden the backis, and felden doun there; and thei that leften fledden to the hil.
Lot is taken prisoner.
Genesis 14:11 Sotheli thei token awei al the catel of Sodom and Gomorre, and alle thingis that perteynen to mete, and yeden awei; Genesis 14:12 also and thei token awey Loth and his catel, the sone of the brother of Abram, which Loth dwellide in Sodom.
Genesis 14:13 And, lo! oon that ascapide, telde to Abram Ebrew, that dwellide in the valei of Mambre of Amorrei, brother of Escol, and brother of Aner; for these maden couenaunt of pees with Abram.
Abram rescueth him.
Genesis 14:14 And whanne Abram hadde herd this thing, that is, Loth his brothir takun, he noumbride his borun seruauntis maad redy thre hundrid and eiytene, and pursuede hem til to Dan. Genesis 14:15 And whanne his felowis weren departid, he felde on hem in the niyt, and he smoot hem, and pursuede hem til to Hoba, and Fenyce, which is at the left side of Damask. Genesis 14:16 And he brouyte ayen al the catel, and Loth his brother with his catel, also wymmen and the puple.
Genesis 14:17 Sotheli the kyng of Sodom yede out in to the metyng of him, after that he turnede ayen fro sleyng of Chodorlaomor, and of kyngis that weren with him, in the valei of Sabe, which is the valey of the kyng.
Melchizedek blesseth Abram.
Genesis 14:18 And sotheli Melchisedech, kyng of Salem, brouyte forth breed and wyn, for he was the preest of hiyeste God; Genesis 14:19 and he blesside Abram, and seide, Blessid be Abram of hiy God, that made heuene and erthe of nouyt,
Abram giveth him tithe.
Genesis 14:20 and blessid be hiy God, bi whom defendynge, enemyes ben bitakun in thin hondis. And Abram yaf tithis of alle thingis to hym. Genesis 14:21 Forsothe the kyng of Sodom seide to Abram, Yyue thou the men to me; take thou othir thingis to thee.
The rest of the spoil, his partners having had their portions, he restoreth to the king of Sodom.
Genesis 14:22 And Abram answerde to hym, Y reyse myn hondis to the hiy Lord God, Genesis 14:23 Lord of heuene and of erthe, that fro the threde of oof til to the layner of the hose I schal not take of alle thingis that ben thine, lest thou seie, I made Abram riche; Genesis 14:24 out takun these thingis whiche the yonge men eeten, and the partis of men that camen with me, Aner, Escol, and Mambre; these men schulen take her partis.
|
