Abram and Lot return out of Egypt.
Genesis 13:1 Therfore Abram stiede fro Egipt, he, and his wijf, and alle thingis that he hadde; and Loth stiede with hym, to the south coost. Genesis 13:2 Forsothe he was ful riche in possessyoun of siluer and of gold. Genesis 13:3 And he turnede ayen bi the weye in which he cam fro the south in to Bethel, til to the place, in which bifore he hadde sett tabernacle, bitwixe Bethel and Hay, Genesis 13:4 in the place of the auter which he made bifore, and inwardli clepide there the name of the Lord.
Genesis 13:5 But also flockis of scheep, and droues of oxun, and tabernaclis weren to Loth, that was with Abram; Genesis 13:6 and the lond miyte not take hem, that thei schulden dwelle togidre, for the catel of hem was myche, and thei miyten not dwelle in comyn.
By disagreement they part asunder.
Genesis 13:7 Wherfor also strijf was maad bitwixe the keperis of flockis of Abram and of Loth. Forsothe Chananei and Feresei dwelliden in that lond in that tyme. Genesis 13:8 Therfor Abram seide to Loth, Y biseche, that no strijf be bitwixe me and thee, and bitwixe my scheepherdis and thi scheepherdis; for we ben britheren. Genesis 13:9 Lo! al the lond is bifore thee, Y biseche, departe thou fro me; if thou go to the left side, Y schal holde the riyt side; if thou chese the riyt side, Y schal go to the left side.
Lot goeth to wicked Sodom.
Genesis 13:10 And so Loth reiside hise iyen, and seiy aboute al the cuntrei of Jordan, which was al moistid, bifor that the Lord distriede Sodom and Gomorre, as paradis of the Lord, and as Egipt, as men comen in to Segor. Genesis 13:11 And Loth chees to him the cuntre aboute Jordan, and departide fro the eest; and thei weren departid ech fro his brother. Genesis 13:12 Abram dwellide in the lond of Chanaan; sotheli Loth dwellide in townes aboute Jordan, and wonide in Sodom. Genesis 13:13 Forsothe men of Sodom weren ful wickid, and synneris greetly bifore the Lord.
God reneweth the promise to Abram.
Genesis 13:14 And the Lord seide to Abram, aftir that Loth was departid fro him, Reise thin iyen forth riyt, and se fro the place in which thou art now, to the north and south, to the eest and west; Genesis 13:15 Y schal yyue al the lond which thou seest to thee and to thi seed, til in to with outen ende. Genesis 13:16 And Y schal make thi seed as the dust of erthe; if ony man may noumbre the dust of erthe, also he schal mowe noumbre thi seed. Genesis 13:17 Therfor rise thou, and passe thorou the lond in his lengthe and breede, for Y schal yyue it to thee.
He removeth to Hebron, and there buildeth an altar.
Genesis 13:18 Therfor Abram, mouynge his tabernacle, cam and dwellide bisidis the valei of Mambre, which is in Ebron; and he bildide there an auter to the Lord.