One language in the world.
Genesis 11:1 Forsothe the lond was of o langage, and of the same speche. Genesis 11:2 And whanne thei yeden forth fro the eest, thei fonden a feeld in the lond of Sennaar, and dwelliden ther ynne.
The building of Babel.
Genesis 11:3 And oon seide to his neiybore, Come ye, and make we tiel stonys, and bake we tho with fier; and thei hadden tiel for stonus, and pitche for morter; Genesis 11:4 and seiden, Come ye, and make we to vs a citee and tour, whos hiynesse stretche til to heuene; and make we solempne oure name bifor that we be departid in to alle londis. Genesis 11:5 Forsothe the Lord cam down to se the citee and tour, which the sones of Adam bildiden.
The confusion of tongues.
Genesis 11:6 And he seide, Lo! the puple is oon, and o langage is to alle, and thei han bigunne to make this, nethir thei schulen ceesse of her thouytis, til thei fillen tho in werk; therfor come ye, go we doun, Genesis 11:7 and scheende we there the tunge of hem, that ech man here not the voys of his neiybore. Genesis 11:8 And so the Lord departide hem fro that place in to alle londis; and thei cessiden to bielde a cytee. Genesis 11:9 And therfor the name therof was clepid Babel, for the langage of al erthe was confoundide there; and fro thennus the Lord scaterede hem on the face of alle cuntrees.
The generations of Shem.
Genesis 11:10 These ben the generaciouns of Sem. Sem was of an hundrid yeer whanne he gendride Arfaxath, twey yeer aftir the greet flood. Genesis 11:11 And Sem lyuede aftir that he gendride Arfaxath fyue hundrid yeer, and gendride sones and douytris. Genesis 11:12 Forsothe Arfaxath lyuede fyue and thretti yeer, and gendride Sale; Genesis 11:13 and Arfaxath lyuede aftir that he gendride Sale thre hundride and thre yeer, and gendride sones and douytris. Genesis 11:14 Also Sale lyuede thretti yeer, and gendride Heber; Genesis 11:15 and Sale lyuede after that he gendride Heber foure hundrid and thre yeer, and gendride sones and douytris. Genesis 11:16 Sotheli Heber lyuede foure and thretti yeer, and gendride Falech; Genesis 11:17 and Heber lyuede aftir that he gendride Falech foure hundrid and thretti yeer, and gendride sones and douytris. Genesis 11:18 Also Falech lyuede thretti yeer, and gendride Reu; Genesis 11:19 and Falech lyuede aftir that he gendride Reu two hundrid and nyne yeer, and gendride sones and douytris. Genesis 11:20 And Reu lyuede two and thretti yeer, and gendride Saruch; Genesis 11:21 and Reu lyuede aftir that he gendride Saruch two hundrid and seuene yeer, and gendride sones and douytris. Genesis 11:22 Sotheli Saruch lyuede thretti yeer, and gendride Nachor; Genesis 11:23 and Saruch lyuede aftir that he gendride Nacor two hundrid yeer, and gendride sones and douytris. Genesis 11:24 Forsothe Nachor lyuede nyne and twenti yeer, and gendride Thare; Genesis 11:25 and Nachor lyuede after that he gendride Thare an hundrid and nynetene yeer, and gendride sones and douytris. Genesis 11:26 And Thare lyuede seuenti yeer, and gendride Abram, and Nachor, and Aran.
The generations of Terah the father of Abram.
Genesis 11:27 Sotheli these ben the generaciouns of Thare. Thare gendride Abram, Nachor, and Aran. Forsothe Aran gendride Loth; Genesis 11:28 and Aran diede bifore Thare, his fadir, in the lond of his natiuite, in Vr of Caldeis. Genesis 11:29 Forsothe Abram and Nachor weddiden wyues; the name of the wijf of Abram was Saray, and the name of the wiif of Nachor was Melcha, the douyter of Aran, fadir of Melcha and fadir of Jescha. Genesis 11:30 Sotheli Saray was bareyn, and hadde no children.
Terah goeth from Ur to Haran.
Genesis 11:31 And so Thare took Abram, his sone, and Loth, the sone of Aran his sone, and Saray, his douyter in lawe, the wijf of Abram, his sone, and ledde hem out of Vr of Caldeis, that thei schulen go in to the lond of Chanaan; and thei camen til to Aran, and dwelliden there. Genesis 11:32 And the daies of Thare weren maad two hundrid yeer and fyue, and he was deed in Aran.