Wycliffe Bible

Exodus 37

The Ark.

Exodus 37:1 Forsothe Beseleel made also an arke of the trees of Sechym, hauynge twey cubitis and an half in lengthe, and a cubit and an half in breede; forsothe the hiynesse was of o cubit and an half; and he clothide the arke with purest gold, with ynne and without forth. Exodus 37:2 And he made to it a goldun coroun bi cumpas, Exodus 37:3 and yetide foure goldun ryngis, bi foure corneris therof, twey ryngis in o side, and twei ryngis in the tother side. Exodus 37:4 And he made barris of the trees of Sechym, whiche barris he clothide with gold, Exodus 37:5 and whiche barris he putte into the ryngis that weren in the sidis of the arke, to bere it.

The Mercy Seat with cherubims.

Exodus 37:6 He made also a propiciatorie, that is, Goddis answeryng place, of pureste gold, of twei cubitis and an half in lengthe, and of o cubit and an half in breede. Exodus 37:7 Also he made twei cherubyns of gold, betun out with hamer, whiche he settide on euer eithir side of the propiciatorie, Exodus 37:8 o cherub in the hiynesse of o part, and the tother cherub in the hiynesse of the tothir part; twei cherubyns, oon in ech hiynesse of the propiciatorie, stretchynge out the wengis, Exodus 37:9 and hilynge the propiciatorie, and biholdynge hem silf togidere and that.

The table with his vessels.

Exodus 37:10 He made also a boord of the trees of Sechym, in the lengthe of twey cubitis, and in the breede of o cubit, whiche boord hadde a cubit and an half in heiythe. Exodus 37:11 And he cumpaside the boord with clenneste gold, and made to it a goldun brynke bi cumpas; Exodus 37:12 and he made to that brynke a goldun coroun, rasid bitwixe of foure fyngris; and on the same coroun he made anothir goldun coroun. Exodus 37:13 Also he yetide foure goldun serclis whiche he settide in foure corneris, Exodus 37:14 bi alle the feet of the boord ayens the coroun, and he puttide barris in to the serclis, that the boord may be borun. Exodus 37:15 And he made tho barris of the trees of Sechym, and cumpasside tho with gold. Exodus 37:16 And he made vesselis to dyuerse vsis of the boord, vessels of vynegre, violis, and litle cuppis, and censeris of pure gold, in whiche the fletynge sacrifices schulen be offrid.

The candlestick with his lamps and instruments.

Exodus 37:17 And he made a candilstike, betun out with hamer, of clenneste gold, of whos barre yerdis, cuppis, and litle rundelis and lilies camen forth; Exodus 37:18 sixe in euer eithir side, thre yerdis on o side, and thre on the tother side; thre cuppis in the maner of a note bi ech yerde, and litle rundels to gidere, and lilies; Exodus 37:19 and thre cuppis at the licnesse of a note in the tother yerde, and litle rundels to gidere, and lilies; forsothe the werk of sixe schaftis, that camen forth of the stok of the candilstike, was euene. Exodus 37:20 Sotheli in that barre weren foure cuppis, in the maner of a note, and litle rundels and lilies weren bi alle cuppis; Exodus 37:21 and litle rundels vndur twei schaftis, bi thre placis, whiche to gidre be maad sixe schaftis comynge forth of o barre; Exodus 37:22 therfor and the litle rundels, and schaftis therof, weren alle betun out with hamer, of pureste gold. Exodus 37:23 He made also seuene lanternes, with her snytyng tongis, and the vessels where tho thingis, that ben snytid out, ben quenchid, of clennest gold. Exodus 37:24 The candilstike with alle his vessels weiyede a talent of gold.

The altar of incense.

Exodus 37:25 He made also the auter of encense, of trees of Sechym, hauynge a cubit bi square, and twei cubitis in heiythe, of whos corneris camen forth hornes. Exodus 37:26 And he clothide it with clenneste gold, and the gridele, and wallis, and hornes; Exodus 37:27 and he made to it a litil goldun coroun bi cumpas, and twei goldun ryngis vndur the coroun, bi ech syde, that barris be put in to tho, and the auter mow be borun. Exodus 37:28 Forsothe he made tho barris of the trees of Sechym, and hilide with goldun platis.

The anointing oil and sweet incense.

Exodus 37:29 He made also oile to the oynement of halewyng, and encense of swete smellynge spiceries, moost clene, bi the werk of a makere of oynement.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook