Wycliffe Bible

Exodus 30

The altar of incense.

Exodus 30:1 Also thou schalt make an auter of the trees of Sechym, to brenne encense; Exodus 30:2 and the auter schal haue a cubit of lengthe, and another cubit of brede, that is foure cornerid, and twei cubitis in heiythe; corneris schulen come forth of the auter. Exodus 30:3 And thou schalt clothe it with clennest gold, as wel the gridil therof, as the wallis and corneris bi cumpas therof; and thou schalt make to the auter a litil goldun coroun, Exodus 30:4 bi cumpas, and twei goldun serclis vndur the coroun by alle sidis, that barris be put in to the serclis, and the auter be borun. Exodus 30:5 Also thou schalt make tho barris of the trees of Sechym, and thou schalt ouergilde; Exodus 30:6 and thou schalt sette the auter ayens the veil, which veil hangith bifor the ark of witnessyng bifor the propiciatorie, bi which the witnessyng is hilid, where Y schal speke to thee. Exodus 30:7 And Aaron schal brenne theronne encense smellynge swetly eerli; whanne he schal araye the lanternes, he schal brenne it; Exodus 30:8 and whanne he settith the lanternes at euentid, he schal brenne euerlastynge encense bifor the Lord, in to youre generaciouns. Exodus 30:9 Ye schulen not offre theronne encense of other makyng, nethir offryng, and slayn sacrifice, nether ye schulen offre fletynge offryngis thereonne. Exodus 30:10 And Aaron schal preie on the corneres therof onis bi the yeer, in the blood which is offrid for synne, and he schal plese theronne in youre generaciouns; it schal be the hooli of hooli thingis to the Lord.

The ransom of souls.

Exodus 30:11 And the Lord spak to Moises, and seide, Exodus 30:12 Whanne thou schalt take the summe of the sones of Israel, alle bi hem silf schulen yyue bi the noumbre prijs for her soulis to the Lord, and veniaunce schal not be in hem, whanne thei ben noumbrid. Exodus 30:13 Sotheli ech that passith to the name, schal yyue this, half a sicle bi the mesure of the temple; a sicle hath twenti halpens; the myddil part of a cicle schal be offrid to the Lord. Exodus 30:14 He that is hadde in noumbre, fro twenti yeer and aboue, Exodus 30:15 schal yyue prijs; a riche man schal not adde to the myddil of cicle, and a pore man schal no thing abate. Exodus 30:16 And thou schalt bitake in to vsis of the tabernacle of witnessyng the money takun, which is gaderid of the sones of Israel, that it be the mynde of hem bifor the Lord, and he schal be merciful to the soulis of hem.

The brasen laver.

Exodus 30:17 And the Lord spak to Moises, and seide, Exodus 30:18 Also thou schalt make a greet vessil of bras with his foundement to waische, and thou schalt sette it bitwixe the tabernacle of witnessyng and the auter of brent sacrifices; and whanne watir is put therynne, Exodus 30:19 Aaron and hise sones schulen waische therynne her hondis and feet, Exodus 30:20 whanne thei schulen entre in to the tabernacle of witnessyng, and whanne thei schulen neiye to the auter that thei offre therynne encense to the Lord, Exodus 30:21 lest perauenture thei dien; it schal be a lawful thing euerlastinge to hym and to his seed bi successiouns.

The holy anointing oil.

Exodus 30:22 And the Lord spak to Moises, and seide, Exodus 30:23 Take to thee swete smellynge spiceries, of the firste and chosun myrre, fyue hundrid siclis; and of canel the half, that is, twei hundrid and fifti siclis; Exodus 30:24 in lijk maner of calamy twei hundrid and fifti siclis; also of casia fyue hundrid siclis, in the weiyte of seyntuarie; oile of olyue trees, the mesure hyn; Exodus 30:25 and thou schalt make the hooly oile of anoyntyng, an oynement maad bi the werk of a makere of oynement. Exodus 30:26 And thou schal anoynte therof the tabernacle of witnessyng, and the ark of testament, and the boord with hise vessels, Exodus 30:27 the candilstike, and the purtenaunces therof, the auteris of encense, Exodus 30:28 and of brent sacrifice, and al the purtenaunce, that perteyneth to the ournyng of tho. Exodus 30:29 And thou schalt halewe alle thingis, and tho schulen be the hooli of holi thingis; he that schal touche tho, schal be halewid. Exodus 30:30 Thou schalt anoynte Aaron, and hise sones, and thou schalt halewe hem, that thei be set in presthod to me. Exodus 30:31 And thou schalt seie to the sones of Israel, This oile of anoyntyng schal be hooli to me in to youre generaciouns. Exodus 30:32 The fleisch of man schal not be anoyntid therof, and bi the makyng therof ye schulen not make another, for it is halewid, and it schal be hooli to you. Exodus 30:33 What euer man makith sich oile, and yyueth therof to an alien, he schal be destried fro his puple.

The composition of the perfume.

Exodus 30:34 Forsothe the Lord seide to Moises, Take to thee swete smellynge spyceries, stacten, and onyca, galban of good odour, and pureste encense, alle schulen be of euene weiyte. Exodus 30:35 And thou schal make encence, maad by werk of oynement makere, meddlid diligentli, and pure, and moost worthi of halewyng. Exodus 30:36 And whanne thou hast powned alle thingis in to smalleste poudre, thou schalt putte therof bifor the tabernacle of witnessyng, in which place Y schal appere to thee; encense schal be to you the hooli of hooli thingis. Exodus 30:37 Ye schulen not make siche a makyng in to youre vsis, for it is hooli to the Lord. Exodus 30:38 What euer man makith a lijk thing, that he vse the odour therof, he schal perische fro his puple.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook