Wycliffe Bible

Exodus 25

What the Israelites must offer for the making of the Tabernacle.

Exodus 25:1 And the Lord spak to Moises, and seide, Speke thou to the sones of Israel, Exodus 25:2 that thei take to me the firste fruytis; of ech man that offrith wilfuli, ye schulen take tho. Exodus 25:3 Forsothe these thingis it ben, whiche ye schulen take, gold, and siluer, and bras, iacynt, Exodus 25:4 and purpur, and reed silk twies died, and bijs, heeris of geet, Exodus 25:5 and skynnes of wetheris maad reed, and skynnes of iacynt, and trees of Sechym, Exodus 25:6 and oile to liytis to be ordeyned, swete smellynge spiceries in to oynement, and encensis of good odour, Exodus 25:7 onochym stoonys, and gemmes to ourne ephod, and the racional. Exodus 25:8 And thei schulen make a seyntuarie to me, and Y schal dwelle in the myddis of hem, bi al the licnesse of the tabernacle, Exodus 25:9 which Y schal schewe to thee, and of alle the vessels of ournyng therof.

The form of the Ark.

Exodus 25:10 And thus ye schulen make it; ioyne ye to gidere an arke of the trees of Sechym, whos lengthe haue twey cubitis and an half, the broodnesse haue a cubit and half, the hiynesse haue in lijk maner a cubit and half. Exodus 25:11 And thou schalt ouergilde it with clenneste gold with ynne and with out forth; and thou schalt make a goldun crowne aboue bi cumpas, Exodus 25:12 and foure goldun cerclis, whiche thou schalt sette bi foure corneris of the arke; twei ceerclis be in o syde, and twei cerclis in the tother side. Exodus 25:13 Also thou schalt make barris of the trees of Sechym, and thou schalt hile tho with gold, Exodus 25:14 and thou schalt brynge yn bi the cerclis that ben in the sidis of the arke, Exodus 25:15 that it be borun in tho, whiche schulen euere be in the ceerclis, nether schulen ony tyme be drawun out of thoo. Exodus 25:16 And thou schalt putte in to the arke the witnessing, which Y schal yyue to thee.

The Mercy Seat, with the cherubims.

Exodus 25:17 And thou schalt make a propiciatorie of clenneste gold; that is a table hilinge the arke; the lengthe therof schal holde twei cubitis and an half, the broodnesse schal holde a cubit and half. Exodus 25:18 Also thou schalt make on euer eithir side of Goddis answeryng place twei cherubyns of gold, and betun out with hamer; Exodus 25:19 o cherub be in o syde of Goddis answeryng place, and the tother in the tother side; Exodus 25:20 hele thei euer either side of the propiciatorie, and holde thei forth wyngis, and hile thei Goddis answeryng place; and biholde thei hem silf to gidere, while the faces ben turned in to the propiciatorie, with which the arke of the Lord schal be hilid, Exodus 25:21 in which arke thou schalt putte the witnessyng, which Y schal yyue to thee. Exodus 25:22 Fro thennus Y schal comaunde, and schal speke to thee aboue the propiciatorie, that is, fro the myddis of twei cherubyns, that schulen be on the arke of witnessyng, alle thingis whiche Y schal comaunde bi thee to the sones of Israel.

The table, with the furniture thereof.

Exodus 25:23 Also thou schalt make a boord of the trees of Sechym, hauinge twei cubitis of lengthe, and a cubit in broodnesse, and a cubit and half in hiyenesse. Exodus 25:24 And thou schalt ouergilde the bord with purest gold, and thou schalt make to it a goldun brynke bi cumpas; Exodus 25:25 and thou schalt make to that brynke a coroun rasid bitwixe foure fyngris hiy, and thou schalt make on that another lytil goldun coroun. Exodus 25:26 And thou schalt make redi foure goldun cerclis, and thou schalt put thoo in foure corners of the same boord, bi alle feet. Exodus 25:27 Vndur the coroun schulen be goldun cerclis, that the barris be put thorou tho, and that the boord may be borun. Exodus 25:28 Thou schalt make tho barris of the trees of Sechym, and thou schalt cumpas with gold to bere the boord. Exodus 25:29 And thou schalt make redi vessels of vynegre, and viols, cenceris, and cuppis of pureste gold, in whiche fletynge sacrifices schulen be offrid. Exodus 25:30 And thou schalt sette on the boord looues of proposicioun, in my siyt euere.

The candlestick, with the instruments thereof.

Exodus 25:31 And thou schalt make a candilstike betun forth with hamer, of clenneste gold, and thou schalt make the schaft therof, and yerdis, cuppis, and litle rundelis, and lilies comynge forth therof. Exodus 25:32 Sixe yerdis schulen go out of the sidis, thre of o side, and thre of the tother. Exodus 25:33 Thre cuppis as in the maner of a note bi ech yerde, and litle rundelis to gidere, and a lilie, and in lijk maner thre cuppis at the licnesse of a note in the tother, and litle rundelis togidere, and a lilie; this schal be the werk of sixe yerdis, that schulen be brouyt forth of the schaft. Exodus 25:34 Forsothe in thilke candilstik e schulen be foure cuppis in the maner of a note, and litle rundels and lilies by ech cuppe; Exodus 25:35 and litle rundelis schulen be vndir twey yerdis bi thre places, whiche yerdis to gidere ben maad sixe, comynge forth of o schaft; and therfor the litle rundelis and yerdis Exodus 25:36 therof schulen be alle betun out with hamer, of clenneste gold. Exodus 25:37 And thou schalt make seuene lanternes, and thou schalt sette tho on the candilstike, that tho schyne euene ayens. Exodus 25:38 Also tongis to do out the snottis, and where tho thingis, that ben snottid out, ben quenchid, be maad of clenneste gold. Exodus 25:39 Al the weiyt of the candilstike with alle hise vesselis schal haue a talent of clennest gold. Exodus 25:40 Biholde thou, and make bi the saumpler, which ys schewide to thee in the hil.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook