Exodus 24
Moses is called up into the mountain.
Exodus 24:1 Also he seide to Moises, Stie thou to the Lord, thou, and Aaron, and Nadab, and Abyu, and seuenti eldere men of Israel; and ye schulen worschipe afer, Exodus 24:2 and Moises aloone stie to the Lord, and thei schulen not neiye, nether the puple schal stie with hym.
The people promise obedience.
Exodus 24:3 Therfore Moises cam, and telde to the puple alle the wordis and domes of the Lord; and al the puple answeride with o vois, We schulen do alle the wordis of the Lord, whiche he spak.
Moses buildeth an altar, and twelve pillars.
Exodus 24:4 Forsothe Moises wroot alle the wordis of the Lord; and he roos eerli, and bildide an auter to the Lord at the rootis of the hil, and he bildide twelue titlis bi twelue lynagis of Israel. Exodus 24:5 And he sente yonge men of the sones of Israel, and thei offriden brent sacrifices, and thei offriden pesible sacrifices to the Lord, twelue calues.
He sprinkleth the blood of the Covenant.
Exodus 24:6 And so Moises took half the part of the blood, and sente in to grete cuppis; forsothe he schedde the residue part on the auter. Exodus 24:7 And he took the book of the boond of pees, and redde, while the puple herde; whiche seiden, We schulen do alle thingis which the Lord spak, and we schulen be obedient. Exodus 24:8 Forsothe he took, and sprengide the blood on the puple, and seide, This is the blood of the boond of pees, which the Lord couenauntide with yow on alle these wordis.
The glory of God appeareth.
Exodus 24:9 And Moises, and Aaron, and Nadab, and Abyu, and seuenti of the eldere men of Israel stieden, Exodus 24:10 and seiyen God of Israel, vndur hise feet, as the werk of safire stoon, and as heuene whanne it is cleer. Exodus 24:11 And he sente not his hond on hem of the sones of Israel, that hadden go fer awei; and thei sien God, and eeten and drunkun.
Exodus 24:12 Forsothe the Lord seide to Moises, Stie thou to me in to the hil, and be thou there, and Y schal yyue to thee tablis of stoon, and the lawe, and comaundementis, whiche Y haue write, that thou teche the children of Israel. Exodus 24:13 Moises and Josue his mynystre risen, and Moises stiede in to the hil of God,
Aaron and Hur have the charge of the people.
Exodus 24:14 and seide to the eldere men, Abide ye here, til we turnen ayen to you; ye han Aaron and Hur with you, if ony thing of questioun is maad, ye schulen telle to hem.
Moses goeth into the mountain, where he continueth forty days and forty nights.
Exodus 24:15 And whanne Moises hadde stied, a cloude hilide the hil, Exodus 24:16 and the glorie of the Lord dwellide on Synai, and kyueride it with a cloude sixe daies; forsothe in the seuenthe dai the Lord clepide hym fro the myddis of the cloude; forsothe the licnesse of glorie of the Lord Exodus 24:17 was as fier brennynge on the cop of the hil in the siyt of the sones of Israel. Exodus 24:18 And Moises entride into the myddis of the cloude, and stiede in to the hil, and he was there fourti daies and fourti nyytis.
|
