Ahasuerus, reading in the chronicles of the good service done by Mordecai, taketh care for his reward.
Esther 6:1 The kyng ledde that nyyt with out sleep, and he comaundide the stories and the bookis of yeeris of formere tymes to be brouyt to hym. And whanne tho weren red in his presense, Esther 6:2 me cam to the place, where it was writun, hou Mardochee hadde teld the tresouns of Gabathan and Thares, oneste seruauntis, couetynge to strangle kyng Assuerus. Esther 6:3 And whanne the kyng hadde herd this, he seide, What onour and meede gat Mardochee for this feithfulnesse? And hise seruauntis and mynystris seiden to hym, Outirli he took no meede.
Haman, coming to sue that Mordecai might be hanged, unawares giveth counsel that he might do him honour.
Esther 6:4 And anoon the kyng seide, Who is in the halle? Sotheli Aaman hadde entrid in to the ynnere halle of the kyngis hows, to make suggestioun to the kyng, that he schulde comaunde Mardochee to be hangid on the iebat, which was maad redi to him. Esther 6:5 And the children answeriden, Aaman stondith in the halle. Esther 6:6 And the kyng seide, Entre he. And whanne he was comun yn, the kyng seide to hym, What owith to be don to the man, whom the kyng desirith onoure? Aaman thouyte in his herte, and gesside, that the kyng wolde onoure noon othere man no but hym silf; Esther 6:7 and he answeride, The man, whom the kyng couetith to onoure, Esther 6:8 owith to be clothid with the kyngis clothis, and to be set on the hors which is of the kyngis sadel, and to take the kyngis diademe on his heed; Esther 6:9 and the firste of the princes and stronge men of the kyng holde his hors, and go bi the stretis of the citee, and crie, and seie, Thus he schal be onourid, whom euer the kyng wole onoure. Esther 6:10 Therfor the kyng seide to hym, Haste thou, and whanne a stoole and hors is takun, do thou, as thou hast spoke, to Mardochee the Jew, that sittith bifor the yatis of the paleis; be thou war, that thou leeue not out ony thing of these, whiche thou hast spoke. Esther 6:11 Therfor Aaman took a stoole and hors, and yede, and criede bifor Mardochee clothid in the strete of the citee, and set on the hors, He is worthi this onour, whom euer the kyng wole onoure.
Complaining of his misfortune, his friends tell him of his final destiny.
Esther 6:12 And Mardochee turnede ayen to the yate of the paleis, and Aaman hastide to go in to his hows, morenynge, and with the heed hilid. Esther 6:13 And he teld to Zares, his wijf, and to frendis alle thingis that hadden bifelde to hym. To whom the wise men, whiche he hadde in counsel, and his wijf, answeriden, If Mardochee, bifor whom thou hast bigunne to falle, is of the seed of Jewis, thou schalt not mowe ayenstonde hym, but thou schalt falle in his siyt. Esther 6:14 Yit while thei spaken, the oneste seruauntis and chast of the kyng camen, and compelliden hym to go soone to the feeste, which the queen hadde maad redi.