Observations of wisdom and folly.
Ecclesiastes 10:1 Flies that dien, leesen the swetnesse of oynement. Litil foli at a tyme is preciousere than wisdom and glorie. Ecclesiastes 10:2 The herte of a wijs man is in his riyt side; and the herte of a fool is in his left side. Ecclesiastes 10:3 But also a fool goynge in the weie, whanne he is vnwijs, gessith alle men foolis. Ecclesiastes 10:4 If the spirit of hym, that hath power, stieth on thee, forsake thou not thi place; for heeling schal make gretteste synnes to ceesse. Ecclesiastes 10:5 An yuel is, which Y siy vndur the sunne, and goith out as bi errour fro the face of the prince; Ecclesiastes 10:6 a fool set in hiy dignyte, and riche men sitte bynethe. Ecclesiastes 10:7 I siy seruauntis on horsis, and princes as seruauntis goynge on the erthe. Ecclesiastes 10:8 He that diggith a diche, schal falle in to it; and an eddre schal bite hym, that distrieth an hegge. Ecclesiastes 10:9 He that berith ouer stoonys, schal be turmentid in tho; and he that kittith trees, schal be woundid of tho. Ecclesiastes 10:10 If yrun is foldid ayen, and this is not as bifore, but is maad blunt, it schal be maad scharp with myche trauel; and wisdom schal sue aftir bisynesse. Ecclesiastes 10:11 If a serpent bitith, it bitith in silence; he that bacbitith priueli, hath no thing lesse than it. Ecclesiastes 10:12 The wordis of the mouth of a wijs man is grace; and the lippis of an vnwijs man schulen caste hym doun. Ecclesiastes 10:13 The bigynnyng of hise wordis is foli; and the laste thing of his mouth is the worste errour. Ecclesiastes 10:14 A fool multiplieth wordis; a man noot, what was bifore hym, and who mai schewe to hym that, that schal come aftir hym? Ecclesiastes 10:15 The trauel of foolis shal turment hem, that kunnen not go in to the citee.
Ecclesiastes 10:16 Lond, wo to thee, whos kyng is a child, and whose princes eten eerli. Ecclesiastes 10:17 Blessid is the lond, whos kyng is noble; and whose princis eten in her tyme, to susteyne the kynde, and not to waste.
Ecclesiastes 10:18 The hiynesse of housis schal be maad low in slouthis; and the hous schal droppe in the feblenesse of hondis.
Ecclesiastes 10:19 In leiyyng thei disposen breed and wyn, that thei drynkynge ete largeli; and alle thingis obeien to monei.
Men's thoughts of kings ought to be reverent.
Ecclesiastes 10:20 In thi thouyt bacbite thou not the kyng, and in the priuete of thi bed, curse thou not a riche man; for the briddis of heuene schulen bere thi vois, and he that hath pennys, schal telle the sentence.