Deuteronomy 27
The people are commanded to write the Law upon stones,
Deuteronomy 27:1 Forsothe Moyses comaundide, and the eldre men, to the puple of Israel, and seiden, Kepe ye ech comaundement which Y comaunde to you to dai. Deuteronomy 27:2 And whanne ye han passid Jordan, in to the lond which thi Lord God schal yyue to thee, thou schalt reyse grete stoonus, and thou schalt make tho pleyn with chalk, Deuteronomy 27:3 that thou mow write in tho alle the wordis of this lawe, whanne Jordan is passid, that thou entre in to the lond which thi Lord God schal yyue to thee, the lond flowynge with mylke and hony, as he swoor to thi fadris. Deuteronomy 27:4 Therfor whanne thou hast passid Jordan, reise thou the stonus whiche Y comaunde to dai to thee, in the hil of Hebal; and thou schalt make tho pleyn with chalk.
and to build an altar of whole stones.
Deuteronomy 27:5 And there thou schalt bilde an auter to thi Lord God, of stoonys whiche yrun touchide not, Deuteronomy 27:6 and of stonys vnformed and vnpolischid; and thou schalt offre theron brent sacrifices to thi Lord God; and thou schalt offre pesible sacrifices, Deuteronomy 27:7 and thou schalt ete there, and thou schalt make feeste bifor thi Lord God. Deuteronomy 27:8 And thou schalt write pleynli and clereli on the stoonys alle the wordis of this lawe.
Deuteronomy 27:9 And Moises and the preestis of the kynde of Leuy seiden to al Israel, Israel, perseyue thou, and here; to day thou art maad the puple of thi Lord God; Deuteronomy 27:10 thou schalt here his vois, and thou schalt do the comaundementis, and riytfulnessis, whiche Y comaunde to thee to dai.
The tribes divided on Gerizim and Ebal.
Deuteronomy 27:11 And Moises comaundide to the puple in that day, and seide, Deuteronomy 27:12 These men schulen stonde on the hil of Garizym to blesse the Lord, whanne Jordan is passid; Symeon, Leuy, Judas, Isachar, Joseph, and Benjamyn. Deuteronomy 27:13 And euene ayens these men schulen stonde in the hil of Hebal to curse, Ruben, Gad, and Aser, Zabulon, Dan, and Neptalym.
The curses pronounced on mount Ebal.
Deuteronomy 27:14 And the dekenes schulen pronounce, and schulen seie with hiy vois to alle the men of Israel, Deuteronomy 27:15 Cursid is the man that makith a grauun ymage and yotun togidere, abhomynacioun of the Lord, the werk of hondis of crafti men, and schal sette it in priuey place; and al the puple schal answere, and schal seie, Amen! Deuteronomy 27:16 He is cursid that onoureth not his fadir and modir; and al the puple schal seie, Amen! Deuteronomy 27:17 Cursid is he that berith ouer the termes of his neiybore; and al the puple schal seie, Amen! Deuteronomy 27:18 Cursid is he that makith a blynde man to erre in the weie; and al the puple schal seie, Amen! Deuteronomy 27:19 He is cursid that peruertith the doom of a comelyng, of a fadirles, ethir modirles child, and of a widewe; and al the puple schal seie, Amen! Deuteronomy 27:20 Cursid is he that slepith with the wijf of his fadir, and schewith the hiling of his bed; and al the puple schal seie, Amen! Deuteronomy 27:21 Cursid is he that slepith with ony beeste; and al the puple schal seie, Amen! Deuteronomy 27:22 Cursid is he that slepith with his sistir, the douytir of his fadir, ethir of his modir; and al the puple schal seie, Amen! Deuteronomy 27:23 Cursid is he that slepith with his wyues modir; and al the puple schal seye, Amen! Deuteronomy 27:24 Cursid is he that sleeth pryueli his neiybore; and al the puple schal seie, Amen! Cursid is he that slepith with the wijf of his neiybore; and al the puple schal seie, Amen! Deuteronomy 27:25 Cursid is he that takith yiftis, that he smyte the lijf of innocent blood; and al the puple schal seie, Amen! Deuteronomy 27:26 Cursid is he that dwellith not in the wordis of this lawe, nethir parfourmeth tho in werk; and al the puple schal seie, Amen!
|
