Deuteronomy 23
Who may not enter into the congregation.
Deuteronomy 23:1 A geldyng whanne hise stoonys ben brokun, ethir kit awey, and his yerde is kit awei, schal not entre in to the chirche of the Lord. Deuteronomy 23:2 A child borun of hordom schal not entre in to the chirche of the Lord, til to the tenthe generacioun. Deuteronomy 23:3 Ammonytis and Moabitis, yhe aftir the tenthe generacioun, schulen not entre into the chirche of the Lord with outen ende; Deuteronomy 23:4 for thei nolden come to you with breed and watir in the weie, whanne ye yeden out of Egipt; and for thei hireden ayens thee Balaam, the sone of Beor, fro Mesopotanye of Sirye, that he schulde curse thee; Deuteronomy 23:5 and thi Lord God nolde here Balaam, and God turnede the cursyng of Balaam in to thi blessyng, for he louyde thee. Deuteronomy 23:6 Thou schalt not make pees with hem, nethir thou schalt seke goodis to hem, in alle the daies of thi lijf in to with outen ende.
Deuteronomy 23:7 Thou schalt not haue abhomynacioun of a man of Ydumye, for he is thi brothir, nethir of a man of Egipt, for thou were a comelyng in the lond of hym. Deuteronomy 23:8 Thei that ben borun of hem, schulen entre in the thridde generacioun in to the chirche of the Lord.
Uncleanness to be avoided in the host.
Deuteronomy 23:9 Whanne thou schalt go out in to batel ayens thin enemyes, thou schalt kepe thee fro al yuel thing.
Deuteronomy 23:10 If a man is among you, which is defoulid in sleep of nyyt, he schal go out of the castels; Deuteronomy 23:11 and he schal not turne ayen bifore that he be waischun in watir at euentid, and aftir the goyng doun of the sunne he schal go ayen in to the castels.
Deuteronomy 23:12 Thou schalt haue a place without the castels, to which thou schalt go out to nedeful thingis of kynde; Deuteronomy 23:13 and thou schalt bere a litil stake in the girdil; and whanne thou hast sete, thou schalt digge bi cumpas, and thou schalt hile with erthe thingis defied out, Deuteronomy 23:14 where thou art releuyd. For thi Lord God goeth in the myddis of castels, that he diliuere thee, and bitake thin enemyes to thee, that thi castels be hooli, and no thing of filthe appere in tho, lest he forsake thee.
Of the fugitive servant.
Deuteronomy 23:15 Thou schalt not bitake a seruaunt to his lord, which seruaunt fleeth to thee; Deuteronomy 23:16 he schal dwelle with thee in the place that plesith hym, and he schal reste in oon of thi citees; and make thou not hym sori.
Of filthiness.
Deuteronomy 23:17 Noon hoore schal be of the douytris of Israel, nether a letchour of the sones of Israel.
Of abominable sacrifices.
Deuteronomy 23:18 Thou schalt not offre the hire of an hoore hows, nether the prijs of a dogge, in the hows of thi Lord God, what euer thing it is that thou hast avowid; for euer eithir is abhomynacioun bifor thi Lord God.
Of usury.
Deuteronomy 23:19 Thou schalt not leene to thi brothir to vsure money, neither fruytis, Deuteronomy 23:20 nethir ony othir thing, but to an alien. Forsothe thou schalt leene to thi brothir without vsure that that he nedith, that thi Lord God blesse thee in al thi werk, in the lond to which thou schalt entre to welde.
Of vows.
Deuteronomy 23:21 Whanne thou makist auow to thi Lord God, thou schalt not tarie to yelde, for thi Lord God schal requyre, ether axe, that; and if thou tariest, it schal be arretid to thee in to synne. Deuteronomy 23:22 If thou nylt bihete, thou schalt be with out synne. Deuteronomy 23:23 Forsothe thou schalt kepe, and do that that yede out onys of thi lippis, as thou bihiytist to thi Lord God, and hast spoke with thin owne wille and thi mouth.
Of trespasses.
Deuteronomy 23:24 If thou entrist in to the vynere of thi neiybore, ete thou grapis, as myche as plesith thee; but bere thou not out with thee. Deuteronomy 23:25 If thou entrist in to the corn of thi freend, thou schalt breke eeris of corn, and frote togidere with the hond; but thou schalt not repe with a sikil.
|
