Enticers to idolatry,
Deuteronomy 13:1 If a prophete risith in the myddis of thee, ethir he that seith hym silf to haue seyn a dreem, and he biforseith a signe and a wondur to comynge aftir, Deuteronomy 13:2 and this that he spak bifallith, and he seith to thee, Go we, and sue alien goddis, whiche thou knowist not, and serue we hem, Deuteronomy 13:3 thou schalt not here the wordis of that prophete, ether of dremere; for youre Lord God assaieth you, that he wite opynli whether ye louen hym ether nay, in al youre herte, and in al youre soule. Deuteronomy 13:4 Sue ye youre Lord, and drede ye hym; kepe ye his comaundementis, and here ye the vois of hym; ye schulen serue hym, and ye schulen cleue to hym. Deuteronomy 13:5 Forsothe thilke prophete, ether the feynere of dremes, schal be slayn; for he spak that he schulde turne you awei fro youre Lord God, that ladde you out of the lond of Egipt, and ayenbouyte you fro the hous of seruage, that thilke prophete schulde make thee to erre fro the weie which thi Lord God comaundide to thee; and thou schalt do awey yuel fro the myddis of thee.
how near soever unto thee,
Deuteronomy 13:6 If thi brothir, the sone of thi modir, ether thi sone, ethir thi douyter, ether the wijf which is in thi bosum, ethir thi freend whom thou louest as thi soule, wole counsele thee, and seith priueli, Go we and serue alien goddis, whiche thou knowist not, Deuteronomy 13:7 and thi fadris, of alle the folkis in cumpas, that ben niy ether fer, fro the bigynnyng til to the ende of the lond, Deuteronomy 13:8 assente thou not to hym, nether here thou, nether thin iyen spare hym, that thou haue mercy, Deuteronomy 13:9 and hide hym, but anoon thou schalt sle hym. Thin hond be fyrst on him and aftir thee al the puple putte to hond.
are to be stoned to death.
Deuteronomy 13:10 He schal be oppressid with stoonus, and schal be slayn; for he wolde drawe thee awei fro thi Lord God, that ledde thee out of the lond of Egipt, fro the hous of seruage, Deuteronomy 13:11 that al Israel here and drede, and do no more ony thing lijk this thing.
Idolatrous cities are not to be spared.
Deuteronomy 13:12 If thou herist ony men seiynge in oon of thi citees, whiche thi Lord God schal yyue to thee to enhabite, Deuteronomy 13:13 The sones of Belial yeden out fro the myddis of thee, and turneden awei the dwelleris of the citee, and seiden, Go we, and serue alien goddis whiche ye knowen not, Deuteronomy 13:14 enquere thou bisili, and whanne the treuthe of the thing is biholdun diligentli, if thou fyndist that this thing is certeyn, which is seid, and that this abhominacioun is doon in werk, Deuteronomy 13:15 anoon thou schalt smyte the dwelleris of that citee bi the scharpnesse of swerd, and thou schalt do it awey, and alle thingis that ben ther ynne, til to beestis. Deuteronomy 13:16 Also what euer thing of purtenaunce of houshold is, thou schalt gadere in the myddis of the stretis therof, and thou schalt brenne with that citee, so that thou waste alle thingis to thi Lord God, and it be a biriel euerlastynge; it schal no more be bildid. Deuteronomy 13:17 And no thing of that cursyng schal cleue in thin hond, that the Lord be turned awei fro the yre of his strong veniaunce, and haue mercy on thee, and multiplie thee, as he swoor to thi fadris. Deuteronomy 13:18 Whanne thou hast herd the vois of thi Lord God, thou schalt kepe alle hise heestis whiche Y comaunde to thee to day, that thou do that that is plesaunt in the siyt of thi Lord God.