Wycliffe Bible

Acts 26

Acts 26:1 And Agrippa seide to Poul, It is suffrid to thee, to speke for thi silf. Thanne Poul helde forth the hoond, and bigan to yelde resoun.

Paul, in the presence of Agrippa, declareth his life from his childhood,

Acts 26:2 Of alle thingis, in whiche Y am accusid of the Jewis, thou king Agrippa, Y gesse me blessid at thee, whanne Y schal defende me this dai; Acts 26:3 moost for thou knowist alle thingis that ben among Jewis, customes and questiouns. For which thing, Y biseche, here me pacientli. Acts 26:4 For alle Jewis that bifor knewen me fro the bigynnyng, knewen my lijf fro yongthe; that fro the bigynnyng was in my folc in Jerusalem, Acts 26:5 if thei wolen bere witnessing, that bi the moost certeyn sect of oure religioun, Y lyuede a Farisee. Acts 26:6 And now for the hope of repromyssioun, that is maad to oure fadris of God, Y stonde suget in dom; Acts 26:7 in which hope oure twelue lynagis seruynge niyt and dai hopen to come; of which hope, sir king, Y am accusid of the Jewis. Acts 26:8 What vnbileueful thing is demed at you, if God reisith deed men? Acts 26:9 And sotheli Y gesside, that Y ouyte do many contrarie thingis ayens the name of Jhesu Nazarene. Acts 26:10 Which thing also Y dide in Jerusalem, and Y encloside manye of the seyntis in prisoun, whanne Y hadde take powere of the princis of preestis. And whanne thei weren slayn, Y brouyte the sentence. Acts 26:11 And bi alle synagogis ofte Y punyschide hem, and constreynede to blasfeme; and more Y wex wood ayens hem, and pursuede in to alien citees.

and how miraculously he was converted, and called to his apostleship.

Acts 26:12 In whiche, the while Y wente to Damask, with power and suffring of princis of preestis, Acts 26:13 at myddai, in the weie Y say, sir king, that fro heuene liyt schynede aboute me, passing the schynyng of the sunne, and aboute hem that weren togidir with me. Acts 26:14 And whanne we alle hadden falle doun in to the erthe, Y herde a vois seiynge to me in Ebrew tunge, Saul, Saul, what pursuest thou me? it is hard to thee, to kicke ayens the pricke. Acts 26:15 And Y seide, Who art thou, Lord? And the Lord seide, Y am Jhesus, whom thou pursuest. Acts 26:16 But rise vp, and stoond on thi feet. For whi to this thing Y apperide to thee, that Y ordeyne thee mynystre and witnesse of tho thingis that thou hast seyn, and of tho in whiche Y schal schewe to thee. Acts 26:17 And Y schal delyuere thee fro puplis and folkis, to whiche now Y sende thee, Acts 26:18 to opene the iyen of hem, that thei ben conuertid fro derknesse to liyt, and fro power of Sathnas to God, that thei take remyssioun of synnes, and part among seyntis, bi feith that is in me. Acts 26:19 Wherfor, sir kyng Agrippa, Y was not vnbileueful to the heuenli visioun; Acts 26:20 but Y tolde to hem that been at Damask first, and at Jerusalem, and bi al the cuntre of Judee, and to hethene men, that thei schulden do penaunce, and be conuertid to God, and do worthi werkis of penaunce. Acts 26:21 For this cause Jewis token me, whanne Y was in the temple, to sle me. Acts 26:22 But Y was holpun bi the helpe of God in to this dai, and stonde, witnessinge to lesse and to more. And Y seye no thing ellis than whiche thingis the prophetis and Moises spaken that schulen come, Acts 26:23 if Crist is to suffre, if he is the firste of the ayenrising of deed men, that schal schewe liyt to the puple and to hethene men.

Festus chargeth him to be mad, whereunto he answereth modestly.

Acts 26:24 Whanne he spak these thingis, and yeldide resoun, Festus seide with greet vois, Poul, thou maddist; many lettris turnen thee to woodnesse. Acts 26:25 And Poul seide, Y madde not, thou beste Festus, but Y speke out the wordis of treuthe and of sobernesse. Acts 26:26 For also the king, to whom Y speke stidfastli, woot of these thingis; for Y deme, that no thing of these is hid fro hym; for nether in a cornere was ouyt of these thingis don. Acts 26:27 Bileuest thou, king Agrippa, to prophetis? Y woot that thou bileuest.

Agrippa is almost persuaded to be a Christian.

Acts 26:28 And Agrippa seide to Poul, In litil thing thou counseilist me to be maad a cristen man. Acts 26:29 And Poul seide, Y desire anentis God, bothe in litil and in greet, not oneli thee, but alle these that heren to dai, to be maad sich as Y am, outakun these boondis. Acts 26:30 And the kyng roos vp, and the president, and Beronyce, and thei that saten niy to hem.

The whole company pronounce him innocent.

Acts 26:31 And whanne thei wenten awei, thei spaken togider, and seiden, That this man hath not don ony thing worthi deth, nether boondis. Acts 26:32 And Agrippa seide to Festus, This man miyt be delyuerid, if he hadde not appelid to the emperour.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook