Wycliffe Bible

Acts 23

As Paul pleadeth his cause,

Acts 23:1 And Poul bihelde in to the counsel, and seide, Britheren, Y with al good conscience haue lyued bifore God, til in to this dai.

Ananias conmmandeth them to smite him.

Acts 23:2 And Anany, prince of prestis, comaundide to men that stoden nyy hym, that thei schulden smyte his mouth. Acts 23:3 Thanne Poul seide to hym, Thou whitid wal, God smyte thee; thou sittist, and demest me bi the lawe, and ayens the law thou comaundist me to be smytun. Acts 23:4 And thei that stoden niy, seiden, Cursist thou the hiyest prest of God? Acts 23:5 And Poul seide, Britheren, Y wiste not, that he is prince of preestis; for it is writun, Thou schalt not curse the prince of thi puple. Acts 23:6 But Poul wiste, that o parti was of Saduceis, and the othere of Fariseis; and he criede in the counsel, Britheren, Y am a Farisee, the sone of Farisees; Y am demyd of the hope and of the ayen rising of deed men.

Dissension among his accusers.

Acts 23:7 And whanne he hadde seid this thing, dissencioun was maad bitwixe the Fariseis and the Saduceis, and the multitude was departid. Acts 23:8 For Saduceis seien, that no rysing ayen of deed men is, nether aungel, nether spirit; but Fariseis knowlechen euer eithir. Acts 23:9 And a greet cry was maad. And summe of Farisees rosen vp, and fouyten, seiynge, We fynden no thing of yuel in this man; what if a spirit, ether an aungel spak to hym? Acts 23:10 And whanne greet discencioun was maad, the tribune dredde, lest Poul schulde be to-drawun of hem; and he comaundide knyytis to go doun, and to take hym fro the myddil of hem, and to lede hym in to castels.

God encourageth him.

Acts 23:11 And in the niyt suynge the Lord stood niy to hym, and seide, Be thou stidfast; for as thou hast witnessid of me in Jerusalem, so it bihoueth thee to witnesse also at Rome. Acts 23:12 And whanne the dai was come, summe of the Jewis gaderiden hem, and maden avow, and seiden, that thei schulden nether eete, ne drinke, til thei slowen Poul. Acts 23:13 And there weren mo than fourti men, that maden this sweryng togider.

The Jews' laying wait for Paul,

Acts 23:14 And thei wenten to the princis of prestis, and eldre men, and seiden, With deuocioun we han a vowid, that we schulen not taste ony thing, til we sleen Poul. Acts 23:15 Now therfor make ye knowun to the tribune, with the counsel, that he bringe hym forth to you, as if ye schulden knowe sum thing more certeynli of hym; and we ben redi to sle hym, bifor that he come. Acts 23:16 And whanne the sone of Poulis sister hadde herd the aspies, he cam, and entride in to the castels, and telde to Poul. Acts 23:17 And Poul clepide to hym oon of the centuriens, and seide, Lede this yonge man to the tribune, for he hath sum thing to schewe to hym. Acts 23:18 And he took hym, and ledde to the tribune, and seide, Poul, that is boundun, preide me to lede to thee this yonge man, that hath sum thing to speke to thee. Acts 23:19 And the tribune took his hoond, and wente with hym asidis half, and axide hym, What thing is it, that thou hast to schewe to me?

is declared unto the chief captain.

Acts 23:20 And he seide, The Jewis ben acordid to preye thee, that to morewe thou brynge forth Poul in to the counsel, as if thei schulden enquere sum thing more certeynli of hym. Acts 23:21 But bileue thou not to hem; for mo than fourti men of hem aspien hym, which han a vowid, that thei schulen not eete nether drynke, til thei sleen hym; and now thei ben redi, abidinge thi biheest. Acts 23:22 Therfor the tribune lefte the yonge man, and comaundide, that he schulde speke to no man, that he hadde maad these thingis knowun to hym. Acts 23:23 And he clepide togidre twei centuriens, and he seide to hem, Make ye redi twei hundrid knyytis, that thei go to Cesarie, and horse men seuenti, and spere men twey hundrid, fro the thridde our of the nyyt. Acts 23:24 And make ye redy an hors, for Poul to ride on, to lede hym saaf to Felix, the presydent. Acts 23:25 For the tribune dredde, lest the Jewis wolden take hym bi the weie, and sle hym, and aftirward he miyte be chalengid, as he hadde take money. Acts 23:26 And wroot hym a pistle, conteynynge these thingis. Claudius Lisias to the beste Felix, president, heelthe.

He sendeth him to Felix the governor.

Acts 23:27 This man that was take of the Jewis, and bigan to be slayn, Y cam vpon hem with myn oost, and delyuerede hym fro hem, whanne Y knewe that he was a Romayn. Acts 23:28 And Y wolde wite the cause, which thei puttiden ayens hym; and Y ledde hym to the counsel of hem. Acts 23:29 And Y foond, that he was accusid of questiouns of her lawe, but he hadde no cryme worthi the deth, ethir boondis. Acts 23:30 And whanne it was teeld me of the aspies, that thei arayden for hym, Y sente hym to thee, and Y warnede also the accuseris, that thei seie at thee. Fare wel. Acts 23:31 And so the knyytis, as thei weren comaundid, token Poul, and ledde hym bi nyyt into Antipatriden. Acts 23:32 And in the dai suynge, whanne the horsmen weren left, that schulden go with hym, thei turneden ayen to the castels. Acts 23:33 And whanne thei camen to Cesarie, thei token the pistle to the president, and thei setten also Poul byfore him. Acts 23:34 And whanne he hadde red, and axide, of what prouynce he was, and knewe that he was of Cilicie, Acts 23:35 Y schal here thee, he seide, whanne thin accuseris comen. And he comaundide hym to be kept in the moot halle of Eroude.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook