Wycliffe Bible

Acts 22

Paul declareth at large, how he was converted to the faith,

Acts 22:1 Britheren and fadris, here ye what resoun Y yelde now to you. Acts 22:2 And whanne sum herden that in Ebrew tunge he spak to hem, thei yauen the more silence. Acts 22:3 And he seide, Y am a man a Jew, borun at Tharse of Cilicie, nurischid and in this citee bisidis the feet of Gamaliel, tauyt bi the treuthe of fadris lawe, a louyere of the lawe, as also ye alle ben to dai. Acts 22:4 And Y pursuede this weie til to the deth, byndynge and bitakinge in to holdis men and wymmen, Acts 22:5 as the prince of prestis yeldith witnessyng to me, and alle the grettest in birth. Of whom also Y took pistlis to britheren, and wente to Damask, to bring fro thennys men boundun in to Jerusalem, that thei schulden be peyned. Acts 22:6 And it was don, while Y yede, and neiyede to Damask, at myddai sudeynli fro heuene a greet plente of liyt schoon aboute me. Acts 22:7 And Y felde doun to the erthe, and herde a voice fro heuene, seiynge to me, Saul, Saul, what pursuest thou me? It is hard to thee to kike ayens the pricke. Acts 22:8 And Y answeride, Who art thou, Lord? And he seide to me, Y am Jhesu of Nazareth, whom thou pursuest. Acts 22:9 And thei that weren with me sien but the liyt, but thei herden not the vois of hym, that spak with me. Acts 22:10 And Y seide, Lord, what schal Y do? And the Lord seide to me, Rise thou, and go to Damask; and there it schal be seid to thee, of alle thingis which it bihoueth thee to do. Acts 22:11 And whanne Y saye not, for the clerete of that liyt, Y was led bi the hond of felowis, and Y cam to Damask. Acts 22:12 And a man, Ananye, that bi the lawe hadde wytnessyng of alle Jewis dwellinge in Damask, Acts 22:13 cam to me, and stood niy, and seide to me, Saul, brother, biholde. And Y in the same our biheelde in to hym. Acts 22:14 And he seide, God of oure fadris hath bifor ordeyned thee, that thou schuldist knowe the wille of him, and schuldist se the riytful man, and here the vois of his mouth. Acts 22:15 For thou schalt be his witnesse to alle men, of tho thingis that thou hast seyn and herd. Acts 22:16 And now, what dwellist thou? Rise vp, and be baptisid, and waische awei thi synnes, bi the name of hym clepid to help.

and called to his apostleship.

Acts 22:17 And it was don to me, as Y turnede ayen in to Jerusalem, and preyede in the temple, that Y was maad in rauysching of soule, Acts 22:18 and Y siy him seiynge to me, Hiye thou, and go out faste of Jerusalem, for thei schulen not resseyue thi witnessing of me. Acts 22:19 And Y seide, Lord, thei witen, that Y was closing togidir in to prisoun, and betinge bi synagogis hem that bileueden in to thee. Acts 22:20 And whanne the blood of Steuene, thi witnesse, was sched out, Y stood niy, and consentide, and kept the clothis of men that slowen hym. Acts 22:21 And he seide to me, Go thou, for Y schal sende thee fer to naciouns.

At the very mentioning of the Gentiles, the people exclaim on him.

Acts 22:22 And thei herden him til this word; and thei reiseden her vois, and seiden, Take awei fro the erthe siche a maner man; for it is not leueful, that he lyue. Acts 22:23 And whanne thei crieden, and kesten awei her clothis, and threwen dust in to the eir,

He should have been scourged,

Acts 22:24 the tribune comaundide hym to be led in to castels, and to be betun with scourgis, and to be turmentid, that he wiste, for what cause thei crieden so to him.

but claiming the privilege of a Roman, he escapeth.

Acts 22:25 And whanne thei hadden boundun hym with cordis, Poul seide to a centurien stondinge niy to hym, Whether it is leueful to you, to scourge a Romayn, and vndampned? Acts 22:26 And whanne this thing was herd, the centurien wente to the tribune, and telde to hym, and seide, What art thou to doynge? for this man is a citeseyn of Rome. Acts 22:27 And the tribune cam niy, and seide to hym, Seie thou to me, whether thou art a Romayn? Acts 22:28 And he seide, Yhe. And the tribune answeride, Y with myche summe gat this fredom. And Poul seide, And Y was borun a citeseyn of Rome. Acts 22:29 Therfor anoon thei that schulden haue turmentid hym, departiden awei fro hym. And the tribune dredde, aftir that he wiste, that he was a citeseyn of Rome, and for he hadde boundun hym. Acts 22:30 But in the dai suynge he wolde wite more diligentli, for what cause he were accusid of the Jewis, and vnbounde hym, and comaundide prestis and al the counsel to come togidir. And he brouyte forth Poul, and sette hym among hem.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook