Wycliffe Bible

Acts 14

Paul and Barnabas are persecuted from Iconium.

Acts 14:1 But it bifelde at Yconye, that thei entriden togidir in to the synagoge of Jewis, and spaken, so that ful greet multitude of Jewis and Grekis bileueden. Acts 14:2 But the Jewis that weren vnbileueful, reiseden persecucioun, and stiriden to wraththe the soulis of hethene men ayens the britheren; but the Lord yaf soone pees. Acts 14:3 Therfor thei dwelliden myche tyme, and diden tristili in the Lord, berynge witnessyng to the word of his grace, yyuynge signes and wondris to be maad bi the hondis of hem. Acts 14:4 But the multitude of the citee was departid, and sum weren with the Jewis, and sum with the apostlis. Acts 14:5 But whanne ther was maad an asaute of the hethene men and the Jewis, with her princis, to turmenten and to stonen hem, Acts 14:6 thei vndurstoden, and fledden togidere to the citees of Licaonye, and Listris, and Derben, and into al the cuntre aboute. Acts 14:7 And thei prechiden there the gospel, and al the multitude was moued togider in the teching of hem. Poul and Barnabas dwelten at Listris.

At Lystra Paul healeth a cripple, whereupon they are reputed as gods.

Acts 14:8 And a man at Listris was sijk in the feet, and hadde sete crokid fro his modris wombe, which neuer hadde goen. Acts 14:9 This herde Poul spekinge; and Poul biheld hym, and siy that he hadde feith, that he schulde be maad saaf, Acts 14:10 and seide with a greet vois, Rise thou vp riyt on thi feet. And he lippide, and walkide. Acts 14:11 And the puple, whanne thei hadde seyn that that Poul dide, reriden her vois in Licaon tunge, and seiden, Goddis maad lijk to men ben comun doun to vs. Acts 14:12 And thei clepiden Barnabas Jubiter, and Poul Mercurie, for he was ledere of the word. Acts 14:13 And the preest of Jubiter that was bifor the citee, brouyte boolis and crownes bifor the yatis, with puplis, and wolde haue maad sacrifice. Acts 14:14 And whanne the apostlis Barnabas and Poul herden this, thei to-renten her cootis; and thei skipten out among the puple, Acts 14:15 and crieden, and seiden, Men, what don ye this thing? and we ben deedli men lijk you, and schewen to you, that ye be conuertid fro these veyn thingis to the lyuynge God, that maad heuene, and erthe, and the see, and alle thingis that ben in hem; Acts 14:16 which in generaciouns passid suffride alle folkis to gon in to her owne weies. Acts 14:17 And yit he lefte not hym silf with out witnessing in wel doyng, for he yaf reyns fro heuene, and times beringe fruyt, and fulfillide youre hertis with meete and gladnesse. Acts 14:18 And thei seiynge these thingis, vnnethis swagiden the puple, that thei offriden not to hem.

Paul is stoned.

Acts 14:19 But sum Jewis camen ouer fro Antioche and Iconye, and counseilden the puple, and stonyden Poul, and drowen out of the citee, and gessiden that he was deed. Acts 14:20 But whanne disciplis weren comun aboute him, he roos, and wente in to the citee; and in the dai suynge he wente forth with Barnabas in to Derben.

They pass through divers churches, confirming the disciples in faith and patience.

Acts 14:21 And whanne thei hadden prechid to the ilk citee, and tauyte manye, thei turneden ayen to Listris, and Iconye, and to Antioche; confermynge the soulis of disciplis, Acts 14:22 and monestinge, that thei schulden dwelle in feith, and seiden, That bi many tribulaciouns it bihoueth vs to entre in to the kingdom of heuenes. Acts 14:23 And whanne thei hadden ordeined prestis to hem bi alle citees, and hadden preied with fastyngis, thei bitoken hem to the Lord, in whom thei bileueden. Acts 14:24 And thei passiden Persidie, and camen to Pamfilie; Acts 14:25 and thei spaken the word of the Lord in Pergen, and camen doun in to Italie.

Returning to Antioch, they report what God had done with them.

Acts 14:26 And fro thennys thei wenten bi boot to Antiochie, fro whennus thei weren takun to the grace of God, in to the werk that thei filliden. Acts 14:27 And whanne thei weren comun, and hadden gaderid the chirche, thei telden hou grete thingis God dide with hem, and that he hadde openyde to hethene men the dore of feith. Acts 14:28 And thei dwelliden not a litil tyme with the disciplis.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook