2 Kings 3
2 Kings 3:1 Forsothe Joram, sone of Achab, regnede on Israel, in Samarie, in the eiytenthe yeer of Josephat, kyng of Juda. And he regnede twelue yeer, 2 Kings 3:2 and he dide yuel bifor the Lord, but not as his fader and modir; 2 Kings 3:3 for he took awei the ymagis of Baal, whiche his fadir hadde maad, netheles in the synnes of Jeroboam, sone of Nabath, that made Israel to do synne, he cleuyde, and yede not awei fro tho.
2 Kings 3:4 Forsothe Mesa, kyng of Moab, nurschide many beestis, and paiede to the kyng of Israel an hundrid thousynde of lambren, and an hundrid thousynde of wetheris, with her fleesis. 2 Kings 3:5 And whanne Achab was deed, he brak the boond of pees, which he hadde with the kyng of Israel.
Jehoram, with Jehoshaphat, and the king of Edom, being distressed for want of water, by Elisha obtaineth water, and promise of victory.
2 Kings 3:6 Therfor kyng Joram yede out of Samarie in that dai, and noumbride al Israel. 2 Kings 3:7 And he sente to Josephat, kyng of Juda, and seide, The kyng of Moab yede awei fro me; come thou with me ayens him to batel. Which Josephat answeride, Y schal stie; he that is myn, is thin; my puple is thi puple; and myn horsis ben thin horsis. 2 Kings 3:8 And he seide, Bi what weie schulen we stie? And he answeride, Bi the deseert of Ydumee. 2 Kings 3:9 Therfor the kyng of Israel, and the kyng of Juda, and the kyng of Edom, yeden forth, and cumpassiden bi the weie of seuene daies; and watir was not to the oost, and to the beestis, that sueden hem. 2 Kings 3:10 And the kyng of Israel seide, Alas! alas! alas! the Lord hath gaderide vs thre kyngis to bitake vs in the hond of Moab. 2 Kings 3:11 And Josephat seide, Whether ony prophete of the Lord is here, that we biseche the Lord bi hym? And oon of the seruauntis of the kyng of Israel answeride, Elisee, the sone of Saphat, is here, that schedde watir on the hondis of Elie. 2 Kings 3:12 And Josephat seide, Is the word of the Lord at hym? Whiche seiden, It is. And the kyng of Israel, and Josephat, kyng of Juda, and the kyng of Edom, yeden doun to hym. 2 Kings 3:13 Forsothe Elise seide to the kyng of Israel, What is to me and to thee? Go thou to the prophetis of thi fadir and of thi modir. And the kyng of Israel seide to hym, Whi hath the Lord gaderid these thre kyngis, to bitake hem into the hondis of Moab? 2 Kings 3:14 And Elisee seide to hym, The Lord of oostis lyueth, in whos siyt Y stonde, if Y were not aschamed of the cheer of Josephat, king of Juda, treuli Y hadde not perseyued, nethir Y hadde biholde thee. 2 Kings 3:15 Now forsothe brynge ye to me a sautrere. And whanne the sautrere song, the hond of the Lord was maad on hym, and he seide, The Lord seith these thingis, 2 Kings 3:16 Make ye the wombe, ether depthe, of this stronde dichis and dichis. 2 Kings 3:17 For the Lord seith these thingis, Ye schulen not se wynd, nethir reyn, and this depthe schal be fillid with watris, and ye schulen drynke, and youre meynees, and youre beestis. 2 Kings 3:18 And this is litil in the siyt of the Lord. Ferthermore also he schal bitake Moab in to youre hondis; 2 Kings 3:19 and ye schulen smyte ech strengthid citee, and ech chosun citee, and ye schulen kitte doun ech tre berynge fruyt, and ye schulen stoppe alle the wellis of watris, and ye schulen hile with stonys ech noble feeld. 2 Kings 3:20 Therfor it was doon eerli, whanne sacrifice is wont to be offrid, and, lo! watris camen bi the weie of Edom, and the lond was fillid with watris.
The Moabites, deceived by the colour of the water, coming to spoil, are overcome.
2 Kings 3:21 Sotheli alle men of Moab herden, that kyngis hadden stied to fiyte ayens hem; and men of Moab clepiden togidere alle men, that weren gird with girdil aboue, and thei stoden in the termes. 2 Kings 3:22 And men of Moab risiden ful eerli, and whanne the sunne was risun thanne euen ayens the watris, thei sien the watris reed as blood euene ayens. 2 Kings 3:23 And thei seiden, It is the blood of swerd, that is, sched out bi swerd; kyngis fouyten ayens hem silf, and thei ben slayn togider; now go thou, Moab, to the prey. 2 Kings 3:24 And thei yeden in to the castels of Israel; forsothe Israel roos, and smoot Moab, and thei fledden bifor men of Israel. Therfor thei that hadden ouercome, camen, and smytiden Moab, and destrieden cytees; 2 Kings 3:25 and alle men sendynge stoonys filliden ech beste feeld, and stoppiden alle the wellis of watris, and kittiden doun alle trees berynge fruyt, so that oneli wallis maad of erthe weren left; and the citee was cumpassid of men settinge engynes, and was smytun bi greet part.
The king of Moab, by sacrificing the king of Edom's son, raiseth the siege.
2 Kings 3:26 And whanne the kyng of Moab hadde seyn this, that is, that the enemyes hadden the maistrie, he took with hym seuene hundrid men drawynge swerdis, that thei shulden breke in to the kyng of Edom; and thei myyten not. 2 Kings 3:27 And he took his firste gendrid sone, that schulde regne for hym, and offride brent sacrifice on the wal; and greet indignacioun was maad in Israel; and anoon thei yeden awei fro hym, and turneden ayen in to her lond.