2 Kings 24
Jehoiakim, first subdued by Nebuchadnezzar, then rebelleth against him, procureth his own ruin.
2 Kings 24:1 In the daies of hym Nabugodonosor, kyng of Babiloyne, stiede, and Joachym was maad seruaunt to hym by thre yeeris; and eft Joachym rebellide ayens hym. 2 Kings 24:2 And the Lord sente to hym theuys of Caldeis, and theuys of Sirie, and theuys of Moab, and theuys of the sones of Amon; and he sente hem in to Juda, that he schulde destrie it, bi the word of the Lord, which he spak bi hise seruauntis prophetis. 2 Kings 24:3 Forsothe this was doon bi the word of the Lord ayens Juda, that he schulde do awei it bifor him silf, for the synnes of Manasses, and alle thingis whiche he dide, 2 Kings 24:4 and for the giltles blood which he sched out; and he fillide Jerusalem with the blood of innocentis; and for this thing the Lord nolde do mercy.
2 Kings 24:5 Forsothe the residue of wordis of Joachim, and alle thingis whiche he dide, whether these ben not writun in the book of wordis of daies of the kyngis of Juda?
Jehoiachin succeedeth him.
2 Kings 24:6 And Joachym slept with hise fadris, and Joakyn, his sone, regnyde for him.
The king of Egypt is vanquished by the king of Babylon.
2 Kings 24:7 And the kyng of Egipt addide no more to go out of hys lond; for the kyng of Babiloyne hadde take alle thingis that weren the kyngis of Egipt, fro the strond of Egipt til to the flood Eufrates.
Jehoiachin's evil reign.
2 Kings 24:8 Joakyn was of eiytene yeer, whanne he bigan to regne, and he regnyde thre monethis in Jerusalem; the name of his modir was Nahesta, douytir of Helnathan of Jerusalem. 2 Kings 24:9 And he dide yuel bifor the Lord, bi alle thingis whiche hise fadir hadde do.
Jerusalem is taken and carried captive into Babylon.
2 Kings 24:10 In that tyme the seruauntis of Nabugodonosor, kyng of Babiloyne, stieden in to Jerusalem, and the citee was cumpassid with bisegyngis. 2 Kings 24:11 And Nabugodonosor, kyng of Babiloyne, cam to the citee with hise seruauntis, that he schulde fiyte ayens it. 2 Kings 24:12 And Joakyn, kyng of Juda, yede out to the king of Babiloyne, he, and his modir, and hise seruauntis, and hise princis, and hise chaumburleyns; and the king of Babiloyne resseyuede him, in the eiythe yeer of his rewme. 2 Kings 24:13 And he brouyte forth fro thens alle the tresours of the hous of the Lord, and the tresours of the kingis hous; and he beet togider alle the goldun vessels, whiche Salomon, king of Israel, hadde maad in the temple of the Lord, bi the word of the Lord. 2 Kings 24:14 And he translatide al Jerusalem, and alle the princis, and alle the strong men of the oost, ten thousynde, in to caitiftee, and ech crafti man, and goldsmyyt; and no thing was left, outakun the pore puplis of the lond. 2 Kings 24:15 Also he translatide Joakyn in to Babiloyne, and the moder of the king, the wyues of the king, and the chaumburleyns of the king; and he ledde the iugis of the lond in to caitifte fro Jerusalem in to Babiloyne; 2 Kings 24:16 and alle stronge men, seuene thousynde; and crafti men and goldsmyythis, a thousynde; alle stronge men and werriouris; and the king of Babiloyne ledde hem prisoners in to Babiloyne.
Zedekiah is made king, and reigneth ill unto the utter destruction of Judah.
2 Kings 24:17 And he ordeynede Mathanye, the brother of his fadir, for hym; and puttide to hym the name Sedechie. 2 Kings 24:18 Sedechie hadde the oon and twentithe yeer of age, whanne he bigan to regne, and he regnyde eleuene yeer in Jerusalem; the name of his modir was Amychal, douyter of Jeremye of Lobna. 2 Kings 24:19 And he dide yuel bifor the Lord, bi alle thingis which Joachym hadde do. 2 Kings 24:20 For the Lord was wrooth ayens Jerusalem, and ayens Juda, til he caste hem awey fro his face; and Sedechie yede awei fro the king of Babiloyne.