2 Chronicles 18
Jehoshaphat, joined in affinity with Ahab, is persuaded to go with him against Ramoth-gilead.
2 Chronicles 18:1 Therfor Josaphat was riche and ful noble, and bi affynyte, ethir alie, he was ioyned to Achab. 2 Chronicles 18:2 And aftir yeeris he cam doun to hym in to Samarie; at whos comyng Achab killide ful many wetheris and oxis, and to the puple that cam with hym; and he counseilide hym to stie in to Ramoth of Galaad. 2 Chronicles 18:3 And Achab, the kyng of Israel, seide to Josaphat, kyng of Juda, Come thou with me in to Ramoth of Galaad. To whom he answeride, As and Y am, thou art; as thi puple, so and my puple; and we schulen be with thee in batel.
Ahab, seduced by flase prophets, according to the word of Micaiah, is slain there.
2 Chronicles 18:4 And Josaphat seide to the kyng of Israel, Y biseche, counsele thou in present tyme the word of the Lord. 2 Chronicles 18:5 Therfor the kyng of Israel gaderide togidere foure hundrid men of prophetis, and seide to hem, Owen we to go in to Ramath of Galaad for to fiyte, ethir take reste? And thei seiden, Stie ye, and God schal bitake in the hond of the king. 2 Chronicles 18:6 And Josaphat seide, Whether no profete of the Lord is here, that we axe also of hym? 2 Chronicles 18:7 And the kyng of Israel seide to Josaphat, O man is, of whom we moun axe the wille of the Lord, but and Y hate hym, for he prophecieth not good, but yuel to me in al tyme; sothely it is Mychee, the sone of Jebla. And Josaphat seide to hym, Kyng, speke thou not in this maner. 2 Chronicles 18:8 Therfor the kyng of Israel clepide oon of the geldyngis, and seide to hym, Clepe thou soone Mychee, the sone of Jebla. 2 Chronicles 18:9 Forsothe the kyng of Israel and Josaphat, the kyng of Juda, saten euer eithir in his seete, and weren clothid in kyngis aray; forsothe thei saten in the cornfloor, ether large hows, bisidis the yate of Samarie; and alle the prophetis profesieden bifor hem. 2 Chronicles 18:10 Forsothe Sedechie, the sone of Cananee, made to hym yrone hornes, and seide, The Lord seith these thingis, With these thou schalt wyndewe Sirie, til thou al to-brake it. 2 Chronicles 18:11 And alle prophetis profesieden in lijk maner, and seiden, Stie thou in to Ramoth of Galaad, and thou schalt haue prosperite; and the Lord schal bitake hem in to the hondis of the kyng. 2 Chronicles 18:12 Forsothe the messanger, that yede to clepe Mychee, seide to hym, Lo! the wordis of alle prophetis tellen with o mouth goodis to the kyng; therfor, Y preye thee, that thi word disente not fro hem, and that thou speke prosperitees. 2 Chronicles 18:13 To whom Mychee answeride, The Lord lyueth, for what euer thingis my Lord spekith to me, Y schal speke these thingis. Therfor he cam to the kyng. 2 Chronicles 18:14 To whom the kyng seide, Mychee, owen we go in to Ramoth of Galaad to fiyte, ether take reste? To whom he answeride, Stie ye, for alle prosperitees schulen come, and enemyes schulen be bitakun in to youre hondis. 2 Chronicles 18:15 And the kyng seide, Eft and eft Y charge thee, that thou speke not to me no but that that is soth in the name of the Lord. 2 Chronicles 18:16 And he seide, Y siy al Israel scaterid in the hillis, as scheep with out scheepherde. And the Lord seide, These men han not lordis; ech man turne ayen in to his hows in pees. 2 Chronicles 18:17 The kyng of Israel seide to Josaphat, Whether Y seide not to thee, that he profesiede not ony good to me, but tho thingis that ben yuele? 2 Chronicles 18:18 And therfor Mychee seide, Here ye the word of the Lord. Y siy the Lord sittynge in his trone, and al the oost of heuene stondynge nyy him at the riytside and leftside. 2 Chronicles 18:19 And the Lord seide, Who schal disseyue Achab, the kyng of Israel, that he stie, and falle doun in Ramoth of Galaad? And whanne oon seide in this maner, and another seide in another maner, a spirit cam forth, 2 Chronicles 18:20 and stood bifor the Lord, and seide, Y schal disseyue hym. To whom the Lord seide, Wherynne, therfor schalt thou disseyue? 2 Chronicles 18:21 And he answeride, Y schal go out, and Y schal be a fals spirit in the mouth of alle hise profetis. And the Lord seide, Thou schalt disseyue, and thou schalt haue the maystri; go thou out, and do so. 2 Chronicles 18:22 Now therfor, lo! the Lord hath youe a spirit of leesyng in the mouth of alle thi prophetis, and the Lord spak yuels of thee. 2 Chronicles 18:23 Forsothe Sedechie, the sone of Chananee, neiyide, and smoot the cheke of Mychee, and seide, Bi what weye passide the Spirit of the Lord fro me to speke to thee? 2 Chronicles 18:24 And Mychee seide, Thou thi silf schalt se in that dai, whanne thou schalt entre fro closet in to closet, that thou be hid. 2 Chronicles 18:25 Sotheli the kyng of Israel comaundide, seiynge, Take ye Mychee, and lede ye hym to Amon, prince of the citee, and to Joas, the sone of Amalech; 2 Chronicles 18:26 and ye schulen seie, The kyng seith these thingis, Sende ye this man in to prisoun, and yyue ye to hym a litil of breed, and a litil of watir, til Y turne ayen in pees. 2 Chronicles 18:27 And Mychee seide, If thou turnest ayen in pees, the Lord spak not in me. And he seide, Alle puplis here ye. 2 Chronicles 18:28 Therfor the kyng of Israel, and Josaphat, the kyng of Juda, stieden in to Ramoth of Galaad. 2 Chronicles 18:29 And the kyng of Israel seide to Josaphat, Y schal chaunge clothing, and so Y schal go to fiyte; but be thou clothid in thi clothis. Therfor whanne the kyng of Israel hadde chaungid clothing, he cam to batel. 2 Chronicles 18:30 Forsothe the kyng of Sirie comaundide to the duykis of his multitude of knyytis, and seide, Fiyte ye not ayens the leeste, nether ayens the mooste; no but ayens the kyng aloone of Israel. 2 Chronicles 18:31 Therfor whanne the princes of the multitude of knyytis hadden seyn Josaphat, thei seiden, This is the kyng of Israel; and thei cumpassiden hym, and fouyten. And he criede to the Lord; and the Lord helpide hym, and turnede hem awey fro hym. 2 Chronicles 18:32 Sotheli whanne the duykis of the multitude of knyytis hadden herd, that it was not the kyng of Israel, thei leften hym. 2 Chronicles 18:33 Forsothe it bifelde, that oon of the puple schette an arewe in to vncerteyn, and smoot the kyng of Israel bitwixe the necke and the schuldris. And he seide to his charietere, Turne thin hond, and lede me out of the scheltrun; for Y am woundid. 2 Chronicles 18:34 And the batel was endid in that dai. Certis the kyng of Israel stood in his chare ayens men of Sirye til to euentid, and he diede, whanne the sunne yede doun.