1 Samuel 30
The Amalekites spoil Ziklag.
1 Samuel 30:1 And whanne Dauid and hise men hadden come in to Sichelech in the thridde dai, men of Amalech hadden maad asauyt on the south part in Sichelech; and thei smytiden Sichelech, and brenten it bi fier. 1 Samuel 30:2 And thei ledden the wymmen prisoneris fro thennus, fro the leeste til to the grete; and thei hadden not slayn ony, but thei ledden with hem, and yeden in her weie.
1 Samuel 30:3 Therfor whanne Dauid and hise men hadde come to the citee, and hadden founde it brent bi fier, and that her wyues, and her sones, and douytris weren led prisoneris,
David asking counsel is encouraged by God to pursue them.
1 Samuel 30:4 Dauid and the puple that was with hym reisiden her voices, and weiliden, til teeris failiden in hem. 1 Samuel 30:5 Forsothe also twei wyues of Dauid weren led prisoneris, Achynoem of Jezrael, and Abigail, the wijf of Nabal of Carmele. 1 Samuel 30:6 And Dauid was ful sori; forsothe al the puple wold stone hym, for the soule of ech man was bittir on her sones and douytris. Forsothe Dauid was coumfortid in his Lord God. 1 Samuel 30:7 And he seide to Abiathar, preest, the sone of Achymelech, Bringe thou ephoth to me. And Abiathar brouyte ephoth to Dauid; 1 Samuel 30:8 and Dauid councelide the Lord, and seide, Schal Y pursue, ether nay, these theues? and schal Y take hem? And the Lord seide to hym, Pursue thou; for with out doute thou schalt take hem, and thou schalt take awey the prey. 1 Samuel 30:9 Therfor Dauid yede, he and sixe hundrid men that weren with hym, and thei camen til to the stronde of Besor; and sotheli the wery men abididen. 1 Samuel 30:10 Forsothe Dauid pursuede, he and foure hundrid men; for twei hundrid abididen, that weren weeri, and myyten not passe the stronde of Besor.
By the means of a revived Egyptian he is brought to the enemies, and recovereth all the spoil.
1 Samuel 30:11 And thei founden a man of Egipte in the feeld, and thei brouyten hym to Dauid; and thei yauen breed to hym, that he schulde ete, and schulde drynke watir; 1 Samuel 30:12 but also thei yauen to hym a gobet of a bundel of drye figis, and twei byndyngis of dried grapis. And whanne he hadde ete tho, his spirit turnede ayen, and he was coumfortid; for he hadde not ete breed, nether hadde drunk watir in thre daies and thre nyytis. 1 Samuel 30:13 Therfor Dauid seide to hym, Whos man art thou, ethir fro whennus and whidur goist thou? And he seide, Y am a child of Egipt, the seruaunt of a man of Amalech; forsothe my lord forsook me, for Y bigan to be sijk the thridde dai ago. 1 Samuel 30:14 Sotheli we braken out to the south coost of Cerethi, and ayens Juda, and to the south of Caleb, and we brenten Sichelech bi fier. 1 Samuel 30:15 And Dauid seide to hym, Maist thou lede me to this cumpeny? Which seide, Swere thou to me bi God, that thou schalt not sle me, and schalt not bitake me in to the hondis of my lord; and Y schal lede thee to this cumpeny. And Dauid swoor to hym.
1 Samuel 30:16 And whanne the child hadde ledde hym, lo! thei saten at the mete, on the face of al the erthe, etynge and drynkynge, and as halewynge a feeste, for al the prey and spuylis whiche thei hadden take of the lond of Filisteis, and of the lond of Juda. 1 Samuel 30:17 And Dauid smoot hem fro euentid til to euentid of the tothir dai, and not ony of hem escapide, no but foure hundrid yonge men, that stieden on camels, and fledden. 1 Samuel 30:18 Forsothe Dauid delyuerede alle thingis whiche the men of Amalech token, and he delyuerede hise twei wyues; 1 Samuel 30:19 nether ony of hem failide fro litil til to greet, as wel of sones as of douytris, and of spuylis; and what euer thingis thei hadden rauyschid, Dauid ledde ayen alle thingis; 1 Samuel 30:20 and he took alle flockis and grete beestis, and droof bifor his face. And thei seiden, This is the prey of Dauid.
1 Samuel 30:21 Forsothe Dauid cam to twei hundrid men, that weren weeri, and abididen, and myyten not sue Dauid; and he hadde comaundid hem to sitte in the stronde of Besor; whiche yeden out ayens Dauid, and the puple that was with hym. Forsothe Dauid neiyede to the puple, and grette it pesibli.
David's law to divide the spoil equally between them that fight and them that keep the stuff.
1 Samuel 30:22 And o man, the werste and vniust of the men that weren with Dauid, answeride, and seide, For thei camen not with vs, we schulen not yyue to hem ony thing of the prey, which we rauyschiden, but his wijf and children suffice to ech man; and whanne thei han take hem, go thei awei. 1 Samuel 30:23 Forsothe Dauid seide, My britheren, ye schulen not do so of these thingis, whiche the Lord yaf to vs, and kepte vs, and yaf the theues, that braken out ayens vs, in to oure hondis; 1 Samuel 30:24 nether ony man schal here vs on this word. For euene part schal be of him that goith doun to batel, and of hym that dwellith at the fardelis; and in lijk maner thei schulen departe. 1 Samuel 30:25 And this was maad a constitucioun and doom fro that dai and afterward, and as a lawe in Israel til in to this dai.
He sendeth presents to his friends.
1 Samuel 30:26 Therfor Dauid cam in to Sichelech, and sente yiftis of the prey to the eldere men of Juda, hise neiyboris, and seide, Take ye blessyng of the prey of enemyes of the Lord; 1 Samuel 30:27 to hem that weren in Bethel, and that weren in Ramoth, at the south, 1 Samuel 30:28 and that weren in Jether, and that weren in Aroer, and that weren in Sephamoth, and that weren in Escama, and that weren in Rethala, 1 Samuel 30:29 and that weren in the citees of Jeramel, and that weren in the citees of Ceny, 1 Samuel 30:30 and that weren in Arama, and that weren in Lautuasam, and that weren in Athec, 1 Samuel 30:31 and that weren in Ebron, and to othere men, that weren in these places, in whiche Dauid dwellide and hise men.
|
