1 Samuel 23
David, enquiring of the LORD by Abiathar, rescueth Keilah.
1 Samuel 23:1 And thei telden to Dauid, and seiden, Lo! Filisteis fiyten ayens Seila, and rauyschen the corn floris. 1 Samuel 23:2 Therfor Dauid councelide the Lord, and seide, Whether Y schal go, and smyte Filisteis? And the Lord seide to Dauid, Go thou, and thou schalt smyte Filisteis, and thou schalt saue Seila. 1 Samuel 23:3 And men, that weren with Dauid, seiden to him, Lo! we ben heere in Judee, and dredden; hou myche more, if we schulen go in to Seila ayens the cumpanyes of Filisteis. 1 Samuel 23:4 Therfor eft Dauid councelide the Lord; which answeride, and seide to Dauid, Rise thou, and go in to Seila; for Y schal bitake Filisteis in thin hond. 1 Samuel 23:5 Therfor Dauid yede, and hise men, in to Seila, and fauyt ayens Filisteis; and he droof awey her werk beestis, and smoot hem with greet wounde; and Dauid sauyde the dwelleris of Seila. 1 Samuel 23:6 Forsothe in that tyme, wher ynne Abiathar, sone of Achymelech, fledde to Dauid in to Seile, he cam doun, and hadde with hym ephoth, that is, the cloth of the hiyeste preest.
God shewing him the coming of Saul, and the treachery of the Keilites, he escapeth from Keilah.
1 Samuel 23:7 Forsothe it was teld to Saul, that Dauid hadde come in to Seila; and Saul seide, The Lord hath take hym in to myn hondis, and he is closid, and entride in to a citee, in which ben yatis and lockis. 1 Samuel 23:8 And Saul comaundide to al the puple, that it schulde go doun to batel in to Seila, and bisege Dauid and hise men.
1 Samuel 23:9 And whanne Dauid perceyuede, that Saul made redi yuel priueli to hym, he seide to Abiathar, preest, Brynge hidur ephoth. 1 Samuel 23:10 And Dauid seide, Lord God of Israel, thi seruaunt herde fame, that Saul disposith to come to Seila, that he distrie the citee for me; 1 Samuel 23:11 if the men of Seila schulen bitake me in to hise hondis, and if Saul schal come doun, as thi seruaunt herde, thou Lord God of Israel schewe to thi seruaunt? And the Lord seide, He schal come doun. 1 Samuel 23:12 And Dauid seide eft, Whether the men of Seila schulen bitake me, and the men that ben with me, in to the hondis of Saul? And the Lord seide, Thei schulen bitake, that is, if thou dwellist in the citee, and Saul come thidur.
1 Samuel 23:13 Therfor Dauid roos, and hise men, as sixe hundrid; and thei yeden out of Seila, and wandriden vncerteyn hidur and thidur. And it was telde to Saul, that Dauid hadde fledde fro Seila, and was saued; wherfor Saul dissymylide to go out.
In Ziph Jonathan cometh and comforteth him.
1 Samuel 23:14 Forsothe Dauid dwellide in the deseert, in strongeste places, and he dwellide in the hil of wildirnesse of Ziph, in a derk hil; netheles Saul souyte hym in alle daies, and the Lord bitook not hym in to the hondis of Saul. 1 Samuel 23:15 And Dauid siy, that Saul yede out, that he schulde seke his lijf. Forsothe Dauid was in the deseert of Ziph, in a wode.
1 Samuel 23:16 And Jonathas, the sone of Saul, roos, and yede to Dauid in to the wode, and coumfortide hise hondis in God. 1 Samuel 23:17 And he seide to Dauid, Drede thou not; for the hond of Saul my fadir schal not fynde thee, and thou schalt regne on Israel, and Y schal be the secounde to thee; but also Saul my father woot this. 1 Samuel 23:18 Therfor euer eithir smoot boond of pees bifor the Lord. And Dauid dwellide in the wode; forsothe Jonathas turnede ayen in to his hows.
The Ziphites discover him to Saul.
1 Samuel 23:19 Forsothe men of Ziph stieden to Saul in Gabaa, and seiden, Lo! whether not Dauid is hid at vs in the sikireste places of the wode, in the hille of Achille, which is at the riyt syde of deseert? 1 Samuel 23:20 Now therfor come thou doun, as thi soule desiride, that thou schuldist come doun; forsothe it schal be oure, that we bitake hym in to the hondis of the kyng. 1 Samuel 23:21 And Saul seide, Blessid be ye of the Lord, for ye sorewiden for my stide. 1 Samuel 23:22 Therfor, Y preie, go ye, and make redi more diligentli, and do ye more curiousli ether intentifli, and biholde ye swiftly, where his foot is, ethir who siy hym there, where ye seiden; for he thenkith on me, that felli Y aspie hym. 1 Samuel 23:23 Biholde ye, and se alle his hidyng places, in whiche he is hid, and turne ye ayen to me at a certeyn thing, that Y go with you; that if he closith hym silf yhe in to erthe, Y schal seke hym with alle the thousyndis of Juda. 1 Samuel 23:24 And thei risiden, and yeden in to Ziph bifor Saul. Forsothe Dauid and hise men weren in the deseert of Maon, in the feldi places, at the riyt half of Jesymyth.
At Maon he is rescued from Saul by the invasion of the Philistines.
1 Samuel 23:25 Therfor Saul yede and hise felowis to seke Dauid, and it was teld to Dauid; and anoon he yede doun to the stoon, and lyuyde in the deseert of Maon; and whanne Saul hadde herd this, he pursuede Dauid in the deseert of Maon. 1 Samuel 23:26 And Saul yede and hise men at the side of the hil on o part; forsothe Dauid and hise men weren in the side of the hil on the tother part; sotheli Dauid dispeiride, that he myyte ascape fro the face of Saul. And so Saul and hise men cumpassiden bi the maner of a coroun Dauid and hise men, that thei schulden take hem.
1 Samuel 23:27 And a messanger cam to Saul, and seide, Haste thou, and come, for Filisteis han spred hem silf on the lond. 1 Samuel 23:28 Therfor Saul turnede ayen, and ceesside to pursue Dauid; and yede ayens the comyng of Filisteis. For this thing thei clepen that place the Stoon Departynge.
He dwelleth at En-gedi.
1 Samuel 23:29 Therfor Dauid stiede fro thennus, and dwellide in the sykireste places of Engaddi.