1 John 4
He warneth them not to believe all teachers, who boast of the Spirit, but to try them by the rules of the catholick faith:
1 John 4:1 Moost dere britheren, nyle ye bileue to ech spirit, but preue ye spiritis, if thei ben of God; for many false prophetis wenten out in to the world. 1 John 4:2 In this thing the spirit of God is knowun; ech spirit that knowlechith that Jhesu Crist hath come in fleisch, is of God; 1 John 4:3 and ech spirit that fordoith Jhesu, is not of God. And this is antecrist, of whom ye herden, that he cometh; and riyt now he is in the world. 1 John 4:4 Ye, litle sones, ben of God, and ye han ouercome hym; for he that is in you is more, than he that is in the world. 1 John 4:5 Thei ben of the world, therfor thei speken of the world, and the world herith hem. 1 John 4:6 We ben of God; he that knowith God, herith vs; he that is not of God, herith not vs. In this thing we knowen the spirit of treuthe, and the spirit of errour.
and by many reasons exhorteth to brotherly love.
1 John 4:7 Moost dere britheren, loue we togidere, for charite is of God; and ech that loueth his brother, is borun of God, and knowith God. 1 John 4:8 He that loueth not, knowith not God; for God is charite. 1 John 4:9 In this thing the charite of God apperide in vs, for God sente hise oon bigetun sone in to the world, that we lyue bi hym. 1 John 4:10 In this thing is charite, not as we hadden loued God, but for he firste louede vs, and sente hise sone foryyuenesse for oure synnes. 1 John 4:11 Ye moost dere britheren, if God louede vs, we owen to loue ech other. 1 John 4:12 No man say euer God; if we louen togidre, God dwellith in vs, and the charite of hym is perfit in vs. 1 John 4:13 In this thing we knowen, that we dwellen in hym, and he in vs; for of his spirit he yaf to vs. 1 John 4:14 And we sayen, and witnessen, that the fadir sente his sone sauyour of the world. 1 John 4:15 Who euer knowlechith, that Jhesu is the sone of God, God dwellith in him, and he in God. 1 John 4:16 And we han knowun, and bileuen to the charite, that God hath in vs. God is charite, and he that dwellith in charite, dwellith in God, and God in hym. 1 John 4:17 In this thing is the perfit charite of God with vs, that we haue trist in the dai of dom; for as he is, also we ben in this world. 1 John 4:18 Drede is not in charite, but perfit charite puttith out drede; for drede hath peyne. But he that dredith, is not perfit in charite. 1 John 4:19 Therfor loue we God, for he louede vs bifore. 1 John 4:20 If ony man seith, that Y loue God, and hatith his brother, he is a liere. For he that loueth not his brothir, which he seeth, hou mai he loue God, whom he seeth not? 1 John 4:21 And we han this comaundement of God, that he that loueth God, loue also his brothir.