1 Chronicles 5
The line of Reuben (who lost his birthright) unto the captivity.
1 Chronicles 5:1 Also the sones of Ruben, the firste gendrid sone of Israel; for he was the first gendrid sone of Israel, but whanne he hadde defoulid the bed of his fadir, the dignitye of his firste gendryng was youun to the sones of Joseph, the sone of Israel; and Ruben was not arettid in to the firste gendrid sone. 1 Chronicles 5:2 Forsothe Judas, that was the strongeste among hise britheren, prynces weren gaderid of his generacioun; forsothe the riyt of firste gendryng was arettid to Joseph. 1 Chronicles 5:3 Therfor the sones of Ruben, the firste gendrid sone of Israel, weren Enoch, and Phallu, Esrom, and Charmy. 1 Chronicles 5:4 The sones of Johel weren Samaie; his sone, Gog; his sone, Semey; his sone, 1 Chronicles 5:5 Mycha; his sone, Rema; his sone, Baal; his sone, 1 Chronicles 5:6 Bera; whom Theglatphalassar, kyng of Assyriens, ledde prisoner; and he was prince in the lynage of Ruben. 1 Chronicles 5:7 Sotheli hise britheren, and al the kynrede, whanne thei weren noumbrid bi her meynees, hadden princes Jehiel, and Zacharie. 1 Chronicles 5:8 Forsothe Bala, the sone of Achaz, sone of Sama, sone of Johel, he dwellide in Aroer til to Nebo and Beelmoon;
Their habitation and conquest of Hagarites.
1 Chronicles 5:9 and he dwellide ayens the eest coost, til to the ende of deseert, and to the flood Eufrates. And he hadde in possessioun myche noumbre of beestis in the lond of Galaad. 1 Chronicles 5:10 Forsothe in the daies of Saul the sones of Ruben fouyten ayens Agarenus, and killide hem; and dwelliden for hem in the tabernaclis of hem, in al the coost that biholdith to the eest of Galaad.
The chief men and habitations of Gad.
1 Chronicles 5:11 Sotheli the sones of Gad euene ayens hem dwelliden in the lond of Basan til to Selca; 1 Chronicles 5:12 Johel was in the bygynnyng, and Saphan was the secounde; also Janahi and Saphan weren in Basan. 1 Chronicles 5:13 Also her britheren bi the housis of her kynredis, Mychael, and Mosollam, and Sebe, and Jore, and Jachan, and Zie, and Heber, seuene. 1 Chronicles 5:14 These weren the sones of Abiahel, the sone of Vry, sone of Jaro, sone of Galaad, sone of Mychael, sone of Esesi, sone of Jeddo, sone of Buz. 1 Chronicles 5:15 Also the britheren of the sone of Abdiel, sone of Gumy, was prince of the hows in hise meynees. 1 Chronicles 5:16 And thei dwelliden in Galaad, and in Basan, and in the townes therof, in alle the subarbis of Arnon, til to the endis. 1 Chronicles 5:17 Alle these weren noumbrid in the daies of Joathan, kyng of Juda, and in the daies of Jeroboam, kyng of Israel.
The number and conquest of Reuben, Gad, and the half of Manasseh.
1 Chronicles 5:18 The sones of Ruben, and of Gad, and of half the lynage of Manasses, weren men werriours, berynge scheeldis and swerdis, and beendynge bouwe, and tauyt to batels, foure and fourti thousynde seuene hundrid and sixti, 1 Chronicles 5:19 and thei yeden forth to batel, and fouyten ayens Agarenus. Forsothe Ethureis, and Napheis, 1 Chronicles 5:20 and Nadab, yauen help to hem; and Agarenus, and alle men that weren with hem, weren bitakun in to the hondis of Ruben, and Gad, and Manasses; for thei clepiden inwardli the Lord, while thei fouyten, and the Lord herde hem, for thei hadden bileuyd in to him. 1 Chronicles 5:21 And thei token alle thingis whiche Agarenus hadden in possessioun, fifti thousynde of camels, and twei hundrid and fifty thousynde of scheep, twei thousynde of assis, and an hundrid thousynde persoones of men; 1 Chronicles 5:22 for many men weren woundid and felden doun; for it was the batel of the Lord. And thei dwelliden for Agarenus til to the conquest.
The habitations and chief men of that tribe.
1 Chronicles 5:23 Also the sones of the half lynage of Manasses hadden in possessioun the lond, fro the endis of Basan til to Baal Hermon, and Sanyr, and the hil of Hermon; for it was a greet noumbre. 1 Chronicles 5:24 And these weren the princes of the hows of her kynrede; Epher, and Jesi, and Heliel, and Esryel, and Jeremye, and Odoie, and Jedihel, strongeste men and myyti, and nemyd duykis in her meynees.
Their captivity for their sin.
1 Chronicles 5:25 Forsothe thei forsoken the God of her fadris, and diden fornycacioun after the goddis of puplis of the lond, whiche the Lord took awei bifor hem. 1 Chronicles 5:26 And the Lord God of Israel reiside the spirit of Phul, kyng of Assiriens, and the spirit of Theglatphalasser, kyng of Assur; and he translatide Ruben, and Gad, and the half lynage of Manasses, and brouyte hem in to Ale, and Abor, and Aram, and in to the ryuer of Gozam, til to this dai.