Wycliffe Bible

1 Chronicles 15

David, having prepared a place for the Ark, ordereth the priests and Levites to bring it from Obed-edom.

1 Chronicles 15:1 And he made to hym housis in the citee of Dauid, and he bildide a place to the arke of the Lord, and araiede a tabernacle to it. 1 Chronicles 15:2 Thanne Dauid seide, It is vnleueful, that the arke of God be borun of ony thing no but of the dekenes, whiche the Lord chees to bere it, and for to mynystre to hym til in to with outen ende. 1 Chronicles 15:3 And he gaderide togidere al Israel in to Jerusalem, that the arke of God schulde be brouyt in to his place, which he hadde maad redy to it; 1 Chronicles 15:4 also and he gaderide togidere the sones of Aaron, and the dekenes; 1 Chronicles 15:5 of the sones of Caath Vriel was prince, and hise britheren two hundrid and twenti; 1 Chronicles 15:6 of the sones of Merari Asaya was prince, and hise britheren two hundrid and thritti; 1 Chronicles 15:7 of the sones of Gerson the prince was Johel, and hise britheren an hundrid and thretti; 1 Chronicles 15:8 of the sones of Elisaphan Semei was prynce, and hise britheren two hundrid; 1 Chronicles 15:9 of the sones of Ebroun Heliel was prince, and hise britheren foure score; 1 Chronicles 15:10 of the sones of Oziel Amynadab was prince, and hise britheren an hundrid and twelue. 1 Chronicles 15:11 And Dauid clepide Sadoch and Abiathar preestis, and the dekenes Vriel, Asaie, Johel, Semeie, Eliel, and Amynadab; and seide to hem, 1 Chronicles 15:12 Ye that ben princes of the meynees of Leuy, be halewid with youre britheren, and brynge ye the arke of the Lord God of Israel to the place, which is maad redi to it; 1 Chronicles 15:13 lest, as at the bigynnyng, for ye weren not present, the Lord smoot vs, and now it be don, if we don ony vnleueful thing. 1 Chronicles 15:14 Therfor the preestis and dekenes weren halewid, that thei schulden bere the arke of the Lord God of Israel. 1 Chronicles 15:15 And the sones of Leuy token the arke of God with barris on her schuldris, as Moises comaundide bi the word of the Lord. 1 Chronicles 15:16 And Dauid seide to the princes of dekenes, that thei schulden ordeyne of her britheren syngeris in orguns of musikis, that is, in giternes, and harpis, and symbalis; that the sown of gladnesse schulde sowne an hiy. 1 Chronicles 15:17 And thei ordeyneden dekenes, Heman, the sone of Johel, and of hise britheren, Asaph, the sone of Barachie; sotheli of the sones of Merary, britheren of hem, thei ordeyneden Ethan, 1 Chronicles 15:18 the sone of Casaye, and the britheren of hem with hem; in the secunde ordre thei ordeyneden Zacarie, and Ben, and Jazihel, and Semyramoth, and Jahiel, and Am, Heliab, and Benaye, and Maasie, and Mathathie, and Eliphalu, and Mathenye, and Obededon, and Jehiel, porteris; 1 Chronicles 15:19 forsothe thei ordeyneden the syngeris Eman, Asaph, and Ethan, sownynge in brasun cymbalis; 1 Chronicles 15:20 sotheli Zacarie, and Oziel, and Semyramoth, and Jahihel, and Ham, and Eliab, and Maasie, and Banaie, sungun pryuetees in giternes; forsothe Mathathie, 1 Chronicles 15:21 and Eliphalu, and Mathenye, and Obededom, and Jehiel, and Ozazym, sungen in harpis for the eiytithe, and epynychion, that is, victorie be to God ouercomere; 1 Chronicles 15:22 forsothe Chinonye, the prince of dekenes, and of profecie, was souereyn to biforsynge melodie, for he was ful wijs; 1 Chronicles 15:23 and Barachie, and Elchana, weren porters of the arke; forsothe Sebenye, 1 Chronicles 15:24 and Josaphath, and Mathanael, and Amasaye, and Zacarie, and Banaye, and Eliezer, preestis, sowneden with trumpis bifor the arke of the Lord; and Obededom, and Achymaas, weren porteris of the arke.

He performeth the solemnity thereof with great joy.

1 Chronicles 15:25 Therfor Dauid, and the grettere men in birthe of Israel, and the tribunes, yeden to brynge the arke of boond of pees of the Lord fro the hows of Obededom with gladnesse. 1 Chronicles 15:26 And whanne God hadde helpid the dekenes that baren the arke of boond of pees of the Lord, seuene bolis and seuene rammes weren offrid. 1 Chronicles 15:27 Forsothe Dauid was clothid with a white stole, and alle the dekenes that baren the arke, and the syngeris, and Chononye, the prince of profecie among syngeris, weren clothid in white stolis; forsothe also Dauid was clothid with a lynun surplijs. 1 Chronicles 15:28 And al Israel ledden forth the arke of boond of pees of the Lord, and sowneden in ioiful song, and in sown of clariouns, and in trumpis, and cymbalis, and giternis, and harpis.

Michal despiseth him.

1 Chronicles 15:29 And whanne the arke of boond of pees of the Lord hadde come to the citee of Dauid, Mychol, the douytir of Saul, bihelde forth bi a wyndowe, and sche siy king Dauyd daunsynge and pleiynge; and sche dispiside hym in hir herte.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook