Wycliffe Bible

1 Chronicles 12

The companies that came to David at Ziklag.

1 Chronicles 12:1 Also these camen to Dauid in Sichelech, whanne he fledde yit fro Saul, the sone of Cys; whiche weren strongeste men and noble fiyterys, 1 Chronicles 12:2 beendynge bouwe, and castynge stoonys with slyngis with euer either hond, and dressynge arowis; of the britheren of Saul of Beniamyn, 1 Chronicles 12:3 the prince Achieser, and Joas, the sones of Samaa of Gabaath, and Jazachel, and Phallech, the sones of Azmod, and Barachie, and Jehu of Anathot; 1 Chronicles 12:4 also Samay of Gabaon was the strongeste among thretti and aboue thretti; Jeremy, and Jezihel, and Johannan, and Zebadga Zerothites, 1 Chronicles 12:5 Elusay, and Jerymoth, and Baalia, and Samaria, and Saphia Araphites, 1 Chronicles 12:6 Elchana, and Jesia, and Azrahel, and Jezer, and Jesbaam of Taremy, 1 Chronicles 12:7 and Joelam, and Sabadia, the sones of Jeroam of Jedor. 1 Chronicles 12:8 But also of Gaddi strongeste men, and beste fiyteris, holdynge scheld and spere, fledden ouer to Dauid, whanne he was hid in deseert; the faces of hem as the face of a lioun, and thei weren swift as capretis in hillis. 1 Chronicles 12:9 Ozer was the prince, Obdias the secounde, Eliab the thridde, 1 Chronicles 12:10 Masmana the fourthe, Jeremye the fyuethe, 1 Chronicles 12:11 Becchi the sixte, Heliel the seuenthe, 1 Chronicles 12:12 Johannan the eiythe, Helzedad the nynthe, 1 Chronicles 12:13 Jeremye the tenthe, Bachana the euleuenthe; 1 Chronicles 12:14 these of the sones of Gad weren princes of the oost; the laste was souereyn ouer an hundrid knyytis, and the moost was souereyn ouer a thousynde. 1 Chronicles 12:15 These it ben that passiden ouer Jordan in the firste monethe, whanne it was wont to flowe ouer hise brynkis; and thei dryueden awei alle men that dwelliden in the valeis at the eest coost and west coost. 1 Chronicles 12:16 Sotheli also men of Beniamyn and of Juda camen to the stronge hoold, whereyn Dauid dwellide. 1 Chronicles 12:17 And Dauid yede out ayens hem, and seide, If ye ben comyn pesible to me, for to helpe me, myn herte be ioyned to you; forsothe if ye setten aspies to me for myn aduersaries, sithen Y haue not wickidnesse in the hondis, God of our fadris se and deme. 1 Chronicles 12:18 Forsothe the spirit clothide Amasay, the prynce among thritti, and he seide, A! Dauid, we ben thin, and thou, sone of Ysai, we schulen be with thee; pees, pees to thee, and pees to thin helperis, for thi Lord God helpith thee. Therfor Dauid resseyuede hem, and made princes of the cumpeny. 1 Chronicles 12:19 Forsothe men of Manasses fledden ouer to Dauid, whanne he cam with Filisteis to fiyte ayens Saul, and he fauyte not with hem, for after that the princes of Filisteis hadden take counsel, thei senten hym ayen, and seiden, With perel of oure heed he schal turne ayen to Saul his lord. 1 Chronicles 12:20 Therfor whanne Dauid turnede ayen in to Sichelech, men of Manasses fledden ouer to hym, Eduas, and Jozabad, Jedihel, and Mychael, and Naas, and Jozabath, and Helyu, and Salathi, princes of knyytis in Manasses. 1 Chronicles 12:21 These men yauen help to Dauid ayens theues; for alle weren strongeste men, and thei weren maad prynces in the oost. 1 Chronicles 12:22 But also bi ech dai men camen to Dauid, for to helpe hym, til that the noumbre was maad greet as the oost of God.

The armies that came to him at Hebron.

1 Chronicles 12:23 Also this is the noumbre of princes of the oost that camen to Dauid, whanne he was in Ebron, that thei schulden translate the rewme of Saul to hym, bi the word of the Lord; the sones of Juda, 1 Chronicles 12:24 berynge scheeld and spere, sixe thousynde and eiyte hundrid, redi to batel; 1 Chronicles 12:25 of the sones of Simeon, seuene thousinde and an hundrid, of strongeste men to fiyte; 1 Chronicles 12:26 of the sones of Leuy, foure thousynde and sixe hundrid; 1 Chronicles 12:27 also Joiada, prince of the generacioun of Aaron, and thre thousynd and seuene hundrid with hym; 1 Chronicles 12:28 also Sadoch, a child of noble wit, and the hows of his fadir, twei and twenti princes; 1 Chronicles 12:29 forsothe of the sones of Beniamyn, britheren of Saul, thre thousynde; for a greet part of hem suede yit the hows of Saul; 1 Chronicles 12:30 forsothe of the sones of Effraym, twenti thousynde and eiyte hundrid, strongeste men in bodili myyt, men named in her meynees; 1 Chronicles 12:31 and of the half part of the lynage of Manasses, eiytene thousynde; alle camen bi her names, to make Dauid kyng; 1 Chronicles 12:32 also of the sones of Ysacar, two hundrid princes, lernd men, that knewen ech tyme to comaunde what the puple of Israel ouyt to do; sotheli al the residue lynage suede the counseils of hem; 1 Chronicles 12:33 forsothe of Zabulon camen fifti thousynde in to helpe, not in double herte, which yeden out to batel, and stoden in the scheltrun, and weren maad redi with armuris of batel; 1 Chronicles 12:34 and of Neptalym a thousynde prynces, and with hem camen seuene and thritti thousynde men, arayed with scheeld and speere; 1 Chronicles 12:35 also of Dan, eiyte and twenti thousynde and sixe hundrid men, maad redi to batel; 1 Chronicles 12:36 and of Aser fourti thousynde men, goynge out to batel, and stirynge to batel in the scheltrun. 1 Chronicles 12:37 Forsothe biyende Jordan, of the sones of Ruben, and of Gad, and of the half part of the lynage of Manasses, sixe scoore thousynde men, araied with armuris of batel. 1 Chronicles 12:38 Alle these men werriouris and redi to batel camen with perfit herte in to Ebron, to make Dauid kyng on al Israel; but also alle the residue of Israel weren of oon herte, that Dauid schulde be maad king on al Israel. 1 Chronicles 12:39 And thei weren ther at Dauid thre daies, and eten and drunken; for her britheren hadden maad redi to hem; 1 Chronicles 12:40 but also thei that weren niy hem, til to Isacar and Zabulon and Neptalym, brouyten looues on assis, and camelis, and mulis, and oxis, for to ete; mele, bundelis of pressid figis, dried grapis, wyn, oile, oxis and wetheres, to al plentee; for ioy was in Israel.

Download these eBooks in Deluxe
Strong's Concordance & Cross-Referenced Student's Editions!

Leave Your Comments Here!


Be a Facebook Fan!
Search Bibles by: All Words Any Word Exact Phrase 2012 OldeBible.com

John Wycliffe Bible Interlinear KJV with Strongs ConcordanceDOWNLOAD this eBookNew offer..
Amazon Kindle
Amazon Kindle devices
Apple iBookstore
Apple iPad/iPhone/iPod
Barnes & Noble Nook
Barnes & Noble Nook