1 Chronicles 11
David by a general consent is made king at Hebron.
1 Chronicles 11:1 Therfor al Israel was gaderid to Dauid in Ebron, and seide, We ben thi boon and thi fleisch; 1 Chronicles 11:2 also yisterdai and the thridde dai ago, whanne Saul regnede yit on Israel, thou it were that leddist out and leddist in Israel; for thi Lord God seide to thee, Thou schalt fede my puple Israel, and thou schalt be prince on it. 1 Chronicles 11:3 Therfor alle the gretter in birthe of Israel camen to the kyng in Ebron; and Dauid maad with hem a boond of pees bifor the Lord, and thei anoyntiden hym kyng on Israel, bi the word of the Lord, which he spak in the hond of Samuel.
He winneth the castle of Zion from the Jebusites by Joab's valour.
1 Chronicles 11:4 Therfor Dauid yede, and al Israel, in to Jerusalem; this Jerusalem is Jebus, where Jebuseis enhabiteris of the lond weren. 1 Chronicles 11:5 And thei that dwelliden at Jebus seiden to Dauid, Thou schalt not entre hidur. Forsothe Dauid took the hiy tour of Syon, which is the citee of Dauid; 1 Chronicles 11:6 and he seide, Ech man that sleeth first Jebusei, schal be prince and duyk. Therfor Joab, sone of Saruye, stiede first, and was maad prince. 1 Chronicles 11:7 Sotheli Dauid dwellide in the hiy tour, and therfor it was clepid the cytee of Dauid; 1 Chronicles 11:8 and he bildide the citee in cumpas fro Mello til to the cumpas; forsothe Joab bildide the tother part of the citee. 1 Chronicles 11:9 And Dauid profitide goynge and wexynge, and the Lord of oostis was with hym.
A catalogue of David's mighty men.
1 Chronicles 11:10 These ben the princes of the stronge men of Dauid, that helpiden hym, that he schulde be kyng on al Israel, bi the word of the Lord which he spak to Israel. 1 Chronicles 11:11 And this is the noumbre of the stronge men of Dauid; Jesbaam, the sone of Achamony, was prince among thretti; this reiside his schaft ethir spere on thre hundrid woundid men in o tyme. 1 Chronicles 11:12 And after hym was Eleazar, the sone of his fadris brothir, and was a man of Ahoit, which Eleazar was among thre miyti men. 1 Chronicles 11:13 This was with Dauid in Aphesdomyn, whanne Filisteis weren gaderid to o place in to batel; and a feeld of that cuntrey was ful of barli, and the puple fledde fro the face of Filisteis. 1 Chronicles 11:14 This Eleazar stood in the myddis of the feeld, and defendide it; and whanne he hadde slayn Filisteis, the Lord yaf greet helthe to his puple.
1 Chronicles 11:15 Sotheli thre of thritti princes yeden doun to the stoon, wher ynne Dauid was, to the denne of Odolla, whanne Filisteis settiden tentis in the valey of Raphaym. 1 Chronicles 11:16 Forsothe Dauid was in a strong hold, and the stacioun, that is, the oost gaderid, of Filisteis was in Bethleem. 1 Chronicles 11:17 Therfor Dauid desiride watir, and seide, Y wolde, that sum man yaf to me water of the cisterne of Bethleem, which is in the yate. 1 Chronicles 11:18 Therfor these thre yeden thoruy the myddil of the castelis of Filisteis, and drowen watir of the cisterne of Bethleem, that was in the yate, and thei brouyten to Dauid, that he schulde drynke; and Dauid nolde drynke it, but rather he offride it to the Lord, and seide, Fer be it, 1 Chronicles 11:19 that Y do this thing in the siyt of my God, and that Y drynke the blood of these men, for in the perel of her lyues thei brouyten watir to me; and for this cause he nolde drynke. Thre strongeste men diden these thingis.
1 Chronicles 11:20 Also Abisai, the brother of Joab, he was the prince of thre men, and he reiside his schaft ayens thre hundrid woundid men; and he was moost named among thre, 1 Chronicles 11:21 among the secounde thre he was noble, and the prince of hem; netheles he cam not til to the firste thre. 1 Chronicles 11:22 Banaye, the sone of Joiada, strongest man of Capsael, that dide many werkis; he killide two stronge men of Moab; and he yede doun, and killide a lioun in the myddil of a cisterne, in the tyme of snow; 1 Chronicles 11:23 and he killide a man of Egipt, whos stature was of fyue cubitis, and he hadde a spere as the beem of webbis; therfor Banaye yede doun to hym with a yerde, and rauyschide the spere, which he held in the hond, and killide hym with his owne spere. 1 Chronicles 11:24 Banaye, the sone of Joiada, dide these thingis, that was moost named among thre stronge men, and was the firste among thretti; 1 Chronicles 11:25 netheles he cam not til to the thre; sotheli Dauid settide hym at his eere.
1 Chronicles 11:26 Forsothe the strongeste men in the oost weren Asael, the brother of Joab, and Eleanan, the sone of his fadris brothir of Bethleem, 1 Chronicles 11:27 Semynoth Arorites, Helles Phallonytes, Iras, 1 Chronicles 11:28 the sone of Acces of Thecue, Abieser of Anathot, 1 Chronicles 11:29 Sobochay Sochites, Ylai Achoytes, 1 Chronicles 11:30 Maray Nethophatithes, Heles, the sone of Banaa, Nethophatithes, 1 Chronicles 11:31 Ethaa, the sone of Rabai, of Gabaath of the sones of Beniamyn; Banaye Pharatonythes, 1 Chronicles 11:32 men of the stronde Gaas, Abihel Arabatithes, 1 Chronicles 11:33 Azmoth Baruanythes, Eliaba Salaonythes, 1 Chronicles 11:34 the sones of Assem Gesonythes, Jonathan, the sone of Saga, Ararithes, 1 Chronicles 11:35 Achiam, the sone of Achar, Ararites, Eliphal, 1 Chronicles 11:36 the sone of Mapher, Mechoratithes, Ahya Phellonythes, 1 Chronicles 11:37 Asrahi Carmelites, Neoray, the sone of Thasbi, 1 Chronicles 11:38 Johel, the brother of Nathan, Mabar, the sone of Aggaray, 1 Chronicles 11:39 Selech Ammonythes, Nooray Berothites, the squyer of Joab, sone of Saruye, 1 Chronicles 11:40 Iras Jetreus, Gareb Jethreus, 1 Chronicles 11:41 Vrie Ethei, Sabab, the sone of Ooli, 1 Chronicles 11:42 Adyna, the sone of Segar Rubenytes, prince of Rubenytis, and thritti men with hym; 1 Chronicles 11:43 Hanan, the sone of Macha, and Josaphath Mathanythes, 1 Chronicles 11:44 Ozias Astarothites, Semma and Jahel, the sones of Hotayn Aroerites, 1 Chronicles 11:45 Ledihel, the sone of Zamri, and Joha, his brother, Thosaythes, 1 Chronicles 11:46 Hehiel Maanytes, Jerybay and Josia, the sones of Helnaen, Jethma Moabites, 1 Chronicles 11:47 Heliel, and Obed, and Jasihel of Masobia.
|
